"ABŞ və İran nümayəndələri Oman dövlətində qapalı danışıqlara başlayıblar". 

Sfera.az xəbər verir ki, bunu politoloq Elxan Şahinoğlu deyib.

O, tərəflərin müzakirə etdiyi mövzulardan danışıb: "Tərəflərin bir-birlərindən tələb və istəklərini bu şəkildə ümumiləşdirmək mümkündür:

1.ABŞ İranda həbsdə saxlanılan vətəndaşlarının sərbəst buraxılmasını istəyir,

2.İrandan uranın zənginləşdirilməsinin 60 faiz həndəvərində (nüvə silahı uranın 90 faiz zəginləşdirilməsi zamanı əldə edilir) və beynəlxalq aləmin nəzarəti altında həyata keçirməsi tələb olunur,

3.Tehrana bağlı qüvvələr Suriya və İraqda ABŞ-yə bağlı qüvvələrə qarşı təxribatlara son qoymalıdırlar,

4.İran Rusiyaya ballistik raketlər verməməlidir;

5.İran atacağı addımların qarşılığında Qərb banklarındakı maliyyə vəsaitləri üzərindən sanskiyaların götürülməsini istəyir,

6.Tehran ABŞ-nin ümumilikdə İrana qarşı iqtisadi sanksiyaların yumşalmasını tələb edir".  

Ekspert ABŞ-İran razılaşmasının əleyhinə olan qüvvələrdən də söz açıb. Ekspert 2 gücün mövcudluğunun tərəflər arasında razılaşma əldə etməyi çətinləşdirdiyini deyib: 

"Danışıqlarda daha çox Tehran maraqlıdır. Sanksiyalar İran iqtisadiyyatını taqətdən salıb. Tehran yenidən Vaşinqtonla nüvə anlaşmasının imzalanmasına çalışır. ABŞ Prezidenti Co Bayden də Ağ Evin keçmiş sahibi Barak Obamanın dövründə olduğu kimi Tehranla saziş imzalamağa həvəs göstərir. Ancaq Baydenin qarşısında iki güc var – ABŞ-dəki sağ mühafizəkar dairələr və Vaşinqtonun strateji müttəfiqi olan İsrail. Onlar İranla istənilən razılaşmanın imzalanmasının əleyhinədirlər. Çünki Tehran nüvə anlaşması imzaladıqdan sonra uranın zənginləşdirməsindən imtina edə bilər, ancaq bölgədəki terrorçu qrupları maliyələşdirməkdən və silahlandırmaqdan imtina etməyəcək. Bu isə ABŞ-nin bölgədəki müttəfiqlərinə, o cümlədən İsrailə təhdid yaradır".

İnci