“Donald Tramp Prezident Co Baydenlə mübarizəyə hazırlaşır”.

Sfera.az bildirir ki, bunu politoloq Elxan Şahinoğlu deyib.

O qeyd edib ki, bunun üçün Tramp Respublikaçı Partiyanın əsas namizədi seçilməli və partiyadaşlarıyla mübarizədə ilkin seçkinin qalibi olmalıdır:

“Rəy sorğuları göstərir ki, Tramp partiyadakı rəqiblərini xeyli üstələyir. Onun sərt çıxışları yenidən məşhurlaşıb. Tramp sadə amerikalıların eşitmək istədiklərini deyir. Məsələn, o deyir ki, prezident olarsa, Rusiya-Ukrayna müharibəsini bitirəcək və ya Çin Tayvanı ələ keçirə bilməyəcək. Trampın fikrincə, Pekin Vaşinqtonun şərtlərini qəbul edəcək. O, Rusiya Prezidenti Vladimir Putinlə və Çin lideri Si Cinpinlə dil tapacağını vurğulayır. Halbuki, ABŞ-Çin arasında münasibətlərdə gərginlik məhz Trampın prezidentliyi dövründə başlamışdı və Ağ Evin o zamankı sahibi Çinə qarşı sərt sanksiyalar tətbiq etmişdi”.

Ekspert bildirib ki, prezident seçkisi yaxnlaşdıqca Tramp fəallığını daha da artıracaq:

“Tanınmış respubkaçı senatorlar, o cümlədən vaxtilə partiyalarından prezidentliyə iddalı olan Marko Rubio və Ted Kruz da Trampı dəstəkləməyə hazırdılar. Görünür, hər iki senator bununla Trampın qələbəsi halında müxtəlif vəzifələrə ümid edirlər.  Ağ Evin hazırkı sahibi Co Baydenin reytinqi yüksək deyil. Baydenin fiziki halı və çıxışları zamanı buraxdığı səhvlər amerikalıları narahat edir. Ona görə də gələcək seçkidə Trampın şansları yüksək sayıla bilər. Trampa mane ola biləcək amillərdən biri ona qarşı hər hansı məhkəmə çəkişməsi ola bilər. Ancaq Tramp bu kimi sınaqlardan uğurla çıxa bilən siyasətçidir”.

Türkan