Çin xarici işlər nazirliyinin rəsmi nümayəndəsi Mao Ninq ölkəsinin Rusiya ilə münasibətlərindən danışıb. O bildirib ki, Çin və Rusiya arasında əməkdaşlıq üçüncü tərəflərə qarşı yönəlməyib.

Bununl bağlı Sfera.az-a açıqlama verən siyasi şərhçi Kənan Novruzov deyib ki, Moskva ilə Pekini birləşdirən əsas məsələlərdən biri ortaq ABŞ təhdididir:

“Çin və Rusiya qarşılıqlı əməkdaşlığı gücləndirməklə Qərbi çəkindirmək, təhlükəsizliklərini möhkəmləndirmək istəyirlər. Bu mənada Çin rəsminin açıqlanmasını səmimi hesab etmirəm. Nəzərə almaq lazımdır ki, tərəflər arasındakı əlaqələr Ukraynadakı müharibəyə qədər bu səviyyədə deyildi. İndi isə onlar əlaqələrini gücləndirməyə məcbur olublar”.

Ekspert bildirib ki, Pekinlə Moskva arasındakı münasibətlər bundan sonra da artan templə davam edəcək:

“Hər iki dövlət çalışacaq ki, müttəfiqlərinin sayı da artsın. Beləliklə, Qərb koalisiyasına bənzər ittifaq yarana bilər. Bu isə gələcəkdə üçüncü dünya müharibəsinin başlanması üçün şərait yaradacaq”.

Günay Rəsulqızı