Son günlər Ukrayna Prezidenti Volodimir Zelenski ilə Çin lideri Si Cinpinin telefon danışığı dünya mediasının müzakirə obyektinə çevrilib.  

Sfera.az-ın məlumatına görə, bununla bağlı fikirlərini bölüşən politoloq Elxan Şahinoğlu xatırladıb ki, Si Cinpin müharibənin yalnız 400-cü günü Kiyevə zəng edib:

“Buna qədər o, Volodimir Zelenski ilə təmasdan yayınıb. “Politico” nəşrində yayımlanan məqalədə Çinin Rusiyaya silah və hərbi texnika verməkdən çəkindiyi bildirilib. Pekin Qərbin sanksiyalarından ehtiyat edir. Buna baxmayaraq, Çin Rusiya ilə əməkdaşlığı genişləndirməyə qərar verib.  Pekin vasitəçi təşəbbüslərini gücləndirməklə bu sahədə Qərbi əvəzləməyə çalışır. Pekinin İranla Səudiyyə Ərəbistanını barışdırması buna nümunədir. Bu iki dövlət arasında danışıqlar Pekində gedirdi. Si Cinpin Moskva və Kiyevlə təmaslara baş vurmaqla Ukraynadakı müharibənin dayandırılması üçün də fəallığını artırıb. Ancaq Qərb Pekinə vasitəçi olmağa imkan verməyəcək”.

Politoloq qeyd edib ki, Pekin hələ də Rusiya ordusunun Ukrayna ərazisini tərk etməli olduğunu demir:

“Bunsuz müharibə dayandırılmayacaq. Pekin Ukraynanın ərazi bütövlüyünü tanısa da, Rusiyanın işğal etdiyi ərazilərlər bağlı mövqe bildirməkdən çəkinir. Kiyev də Pekinin bu şəkildə vasitəçiliyini qəbul etməyəcək. Buna baxmayaraq, Ukrayna Prezidenti Volodimir Zelenski Çin lideri Si Cinpinlə dialoqunu davam etdirəcək. Bu, Zelenskiyə ona görə lazımdır ki, Pekin tamamilə Kremlin yanında yer almasın və Çin Rusiyaya həri texnika satmağa qərar verməsin”.

Günay Rəsulqızı