Azərbaycan Prezidenti İlham Əliyevlə ABŞ dövlət katibi Entoni Blinken arasında telefon danışığı olub. Blinken  Ermənistanla Azərbaycan arasında sülh müqaviləsi üzrə danışıqların əhəmiyyətini vurğulayıb, bu xüsusda ABŞ-nin dəstəyinin davam edəcəyini bildirib.

O, həmçinin, sülhün əldə edilməsinin mümkünlüyünə inandığını deyib və Azərbaycan-Ermənistan sərhədində sərhəd-buraxılış məntəqəsinin qurulmasına toxunub.

Bununla bağlı Sfera.az-a açıqlama verən siyasi şərhçi Kənan Novruzov xatırladıb ki, Blinken daha əvvəl Ermənistan baş naziri Nikol Paşinyanla da danışıb və liderlərlə təmasların ölkələrin xarici işlər nazirlərinin görüşündən əvvəl baş tutması diqqət çəkir:

“Rəsmi Vaşinqton sülh müqaviləsi istiqamətində müəyyən nəticələrin əldə olunmasında nəinki maraqlı, həm də israrlıdır. Bəllidir ki, Ermənistanla Azərbaycan arasında ehtimal edilən sülh müqaviləsi ilə bağlı üç əsas platforma var: Vaşinqton, Brüssel və Moskva formatları. Son zamanlar ABŞ digər iki gücü qabaqlayıb və daha real vasitəçiyə çevrilib. Bunun bir neçə əsas səbəbi var.

Birincisi, Rusiyanın vasitəçilik səyləri istədiyimiz sürətlə davam etmir.

İkincisi, əslində Avropa İttifaqı(Aİ) ilk vaxtlar vasitəçilik səylərində səmimi görünürdü. Amma Fransa bu qurumunun sədri kimi çox vaxt olduğu kimi yenə də "suların durulmasına" mane olur. Parisin açıq-aydın ermənipərəst mövqeyi Aİ-nin vasitəçiliyində də hiss olunur.

Üçüncüsü, ABŞ Rusiyaya nisbətən sülh müqaviləsində daha maraqlıdır. Ağ Evi düşündürən regiondakı iqtisadi maraqlarıdır. Bu maraqların reallaşması üçün isə isə bölgədə təhlükəsizliyin təmin olunması və nəqliyyat-kommunikasiya xətlərinin açılması vacibdir”.

Ekspert bildirib ki, Ağ Ev sülh müqaviləsi istiqamətində müəyyən nəticələrin əldə olunması üçün tələsir:

“Nazirlərin görüşündə hansısa nəticələrin əldə olunması mümkündür. Blinkenin görüşdən əvvəl liderlərlərlə telefon danışığı da bunu deməyə əsas verir. Blinkenin iştirakı ilə nazirlərin görüşünün nəticəsində sülh müqaviləsinin ilkin variantının müəyyən tarixədək hazırlanması, həmçinin nəqliyyat - kommunikasiya əlaqələrinin perspektivi, Qarabağdakı ermənilərin Azərbaycana inteqrasiyası istiqamətində  müzakirələrin aparılması və müəyyən razılıqların əldə olunması mümkündür. Bu mənada görüşün nəticəsinin rəsmi Bakının maraqlarına uyğun olacağını təxmin edə bilərik”.

Günay Rəsulqızı