“Ermənistanın Baş naziri Nikol Paşinyanın parlamentdəki son çıxışında iki fikir diqqət cəlb edib”.

Sfera.az bildirir ki, bunu politoloq Elxan Şahinoğlu deyib.

Ekspertin sözlərinə görə, sözügedən ilk çıxış Nikolun hökumətin əsas vəzifəsi ilə bağlı səsləndirdiyi fikirdir:

“Paşinyan hökumətin əsas vəzifəsinin xalqı ağrılı və güzəştli qərarlara hazırlamaq olduğunu deyib. Onun ikinci cümləsi isə təxminən belədir: “Ermənistanın inkişafının və ərazisinin genişlənməsinin başqalarına qarşı istifadəsi ilə barışmayacaqlar”.

Bu iki cümlə Azərbaycanla bağlıdır və bu mənada Paşinyan haqlıdır. Paşinyanın vəzifəsi xalqını Azərbaycanın ərazi bütövlüyünə və Qarabağı Azərbaycan ərazisi kimi tanımağa hazırlamaqdır. Əslində müharibədən məğlubiyyətlə ayrılan Paşinyana yenidən səs verən susqun çoxluq Qarabağı Azərbaycan ərazisi kimi tanımağa çoxdan hazırdır. 

İkinci fikri də reallığı əks etdirir ki, Azərbaycan Ermənistanın hərbi gücünün artmasının yenidən bizə qarşı istifadəsinə seyrçi qalmayacaq. Gərək Ermənistan Azərbaycan və Türkiyə ilə yazılı anlaşmalarla sülh əldə etsin ki, inkişafı ehtimalı heç kimə mane olmasın”.

E.Şahinoğlu xatırladıb ki, Nikol Paşinyan ötənilki çıxışında Ermənistanın Qarabağ yükünü daşımadığını bildirib: “Ancaq o, bu çıxışından sonra addım atmadı. İndi də lazımi sözlər deyib, bu dəfə də ardını gətirməsə, özünün də dediyi kimi ölkəsi gərginlikdən qurtula bilməyəcək”.

Günay Rəsulqızı