Rusiyanın ABŞ-dəki səfiri Anatoli Antonov amerikalılar tərəfindən hədələndiklərini deyib.

Sfera.az bildirir ki, o, bu barədə Rusiyanın “Birinci Kanalı”na açıqlamasında söyləyib. Antonov buna səbəb kimi ““The Wall Street Journal” qəzetinin jurnalisti Evan Qerşkoviçin həbsini göstərib.

“Amerikalılar bizi yaxın gələcəkdə Qerşkoviçi azad etməsək, cavab tədbirləri görməklə hədələyiblər. Onların necə davranacağını görəcəyik. Bəlkə də bizim üçün qarşılıqlı münasibət göstərməyin, yəni Moskva və bütövlükdə Rusiyada işləyən amerikalı jurnalistlərin sayını Vaşinqton və Nyu-Yorkda işləyən rus jurnalistlərin sayına qədər azaltmağın vaxtı çatıb”, - səfir əlavə edib.

Qeyd edək ki, ABŞ-də dərc edilən nüfuzlu “Wall Street Journal”ın (WSJ) müxbiri Evan Qerşkoviç FTX əməkdaşları tərəfindən Yekaterinburq Tarix Muzeyinin yaxınlığındakı “Bukovski Qril” restoranında saxlanılıb. Qerşkoviç casusluqda ittiham olunur. Federal Təhlükəsizlik Xidmətinin məlumatına görə, jurnalist ABŞ-nin göstərişi ilə Rusiya hərbi-sənaye kompleksinin müəssisələrindən biri haqqında dövlət sirri təşkil edən məlumatlar toplayırmış. Bildirilir ki, Evan rusların “Vaqner” özəl hərbi şirkəti ilə münasibətləri barədə material hazırlayıb, yerli fəallardan müsahibə alıb.

Günay Rəsulqızı