Dekabrın 26-27-də Ermənistanın baş naziri Nikol Paşinyan MDB-yə üzv dövlətlərin Sankt-Peterburqda keçiriləcək qeyri-rəsmi sammitində iştirak edəcək. Sammit zamanı Rusiya Prezidenti Vladimir Putinin iştirakı ilə İlham Əliyevlə Paşinyanın görüşünün təşkil olunacağı haqda iddialar səsləndirilir. Digər tərəfdən isə Rusiya Prezidentinin mətbuat katibi Dmitri Peskov ötən gün sözügedən tədbir çərçivəsində Ermənistan, Rusiya və Azərbaycan liderlərinin üçtərəfli görüşünün planlaşdırılmadığını bildirib.

MDB-yə üzv dövlətlərin qeyri-rəsmi sammitindən gözləntilər nələrdir?

Mövzuyla bağlı Sfera.az-a açıqlama verən politoloq Əlimusa İbrahimov deyib ki, sammitə saatlar qalmış Dmitri Peskovun görüşlə bağlı açıqlaması böyük ehtimalla Paşinyanın tələbindən sonra reallaşıb:

“Çünki onun İlham Əliyev və Vladimir Putinlə görüşməyə üzü yoxdur. Amma Paşinyanın görüşmək istəməməsi onun Putin tərəfindən cəzalandırılmayacağı anlamına gəlmir. Hər halda Kreml rəhbəri bir neçə dəqiqəlik olsa belə, Baş naziri xəlvətə çəkəcək. Çünki Paşinyan və onun Xarici İşlər Naziri Ararat Mirzoyanın son demarşları Putin tərəfindən reaksiyasız qarşılana bilməz”.

Müsahibimiz qeyri-rəsmi sammit fonunda Laçın yolunda davam edən aksiya mövzusuna da toxunub:

“Rusiya sülhməramlıları onların yanına qədər gələn Xankəndi sakinlərini arxayın edərək yola salıblar ki, sabaha qədər dözsünlər. Guya dekabrın 26-da Rusiyada çox əhəmiyyətli görüş keçiriləcək və bu görüşdən sonra yol açılacaq. Amma məsələ bir qədər qaranlıq qalır. Əgər Paşinyan İlham Əliyev və Vladimir Putinlə görüşməkdən çəkinirsə "bağlanan" yolun açılması necə reallaşa bilər? Müzakirələr kimlə aparılacaq? Hər halda bir neçə saatdan sonra hər şey aydın olacaq”.

Günay Rəsulqızı