Rusiya Çinlə əməkdaşlığı daha da GÜCLƏNDİRİR - Medvedev Çin Prezidenti ilə nə danışıb?
Rusiya Federasiyası Təhlükəsizlik Şurasının sədr müavini, “Vahid Rusiya” partiyasının sədri Dmitri Medvedev Pekində Çin Prezidenti Si Cinpinlə görüşüb.
Sfera.az bildirir ki, səfər dekabrın 20-21-də baş tutub. Medvedev Çin sədrinə Rusiya Prezidenti Vladimir Putinin mesajını çatdırıb. Danışıqlarda həmçinin beynəlxalq problemlər, o cümlədən Ukrayna böhranı müzakirə olunub.
“Medvedev Çin dövlətinin başçısına Rusiya Federasiyasının Prezidenti Vladimir Putinin mesajını çatdırıb, bu mesaj xüsusilə, Rusiya-Çin siyasi dialoqunun və praktiki əməkdaşlığın inkişaf etdirilməsini əhatə edib. Tərəflər Moskva və Pekinin ən aktual dünya problemlərinə yanaşmalarının üst-üstə düşdüyünü bəyan ediblər. Görüş zamanı BMT və digər çoxtərəfli platformalar, o cümlədən ŞƏT, BRİKS və G20 daxil olmaqla, strateji xarici siyasət koordinasiyası mövzusuna toxunulub. Ukrayna böhranı da daxil olmaqla, postsovet məkanındakı vəziyyət müzakirə edilib”, - deyə qurumun bəyanatında vurğulanıb.
Məlumata görə, Rusiya-Çin arasında Putin və Si Cinpinin qarşıya qoyduğu ümumi vəzifələr kontekstində əməkdaşlığın intensivləşdirilməsinə dair razılıq əldə olunub. Medvedevin Çin sədri ilə danışıqları pandemiyanın başlanğıcından bəri ilk təkbətək görüş olub.
Qeyd edək ki, Rusiya nümayəndə heyətinin tərkibində Medvedevdən başqa, “Vahid Rusiya” Baş Şurasının katibi, Federasiya Şurasının birinci vitse-spikeri Andrey Turçak və Dövlət Dumasında “Vahid Rusiya” fraksiyasının rəhbəri Vladimir Vasilyev də yer alıb.
Günay Rəsulqızı
