26-27 dekabr tarixlərində Müstəqil Dövlətlər Birliyi (MDB) liderlərinin qeyri- formal sammitinin keçirilməsi gözlənilir. Sammitin Sankt-Peterburqda təşkil ediləcəyi idia olunur.

Maraqlıdır, BMT-nin Təhlükəsizlik Şurasının iclasından sonra keçiriləcək sammitdə hansı qərarlar qəbul edilə bilər?

Məsələ ilə bağlı Sfera.az-a danışan politoloq Tofiq Abbasov bəzi ölkələrin Azərbaycanı manipulyasiya etmək niyyətində olduğunu deyib:

“Laçın yolundan istifadə Azərbaycana maneə yaratmamalıdır. Biz bu yolda problem yaradılmasına, qanunsuz daşınmaların icrasına qarşıyıq. Hazırda ekoaktivistlərin və ictimai birliklərin keçirdiyi aksiyada bu yöndə səslər ucalmaqdadır. Azərbaycan əleyhinə açıqlama verən tərəflər də çox gözəl anlayır ki, əslində Şuşa-Xankəndi yolunda nə baş verir. Lakin məkrli qüvvələr istəyirlər ki, Azərbaycanda manipulyasiya aparsınlar, hadisələri öz istədikləri məcrada yönəltsinlər. Lakin bu, əbəsdir. Çünki Azərbaycanda güclü vətəndaş cəmiyyəti var və məkrli planlar xaosa uğrayacaq”.

Ekspert MDB-nin son sammitində Azərbaycan üçün  müsbət fikirlərin səsləndiriləcəyini qeyd edib:

"Biz KTMT-nin iclasında müşahidə etdik ki, üzv dövlətlər Ermənistanın tərəfindən çıxış etmədi. Bu mənada MDB-də də Azərbaycana dost olan ölkələrin mövcudluğunu nəzərə alsaq, mənfi yöndə qərarların qəbul olunacağı gözlənilən deyil. Bu sammitin keçirilməsi bizim üçün çox vacibdir. Ümumiyyətlə, bu tip iclasların keçirilməsi, müzakirələrin aparılması yaxşı haldır. Nəticə etibarilə, ölkələrin mövqelərini aydınlaşdırmaq mümkün olur. Bu mənada sammitin nəticələri bizim üçün maraqlıdır. Qeyd edim ki, rus sülhməramlı qüvvələri bir çox problemlər yaradıb, Vardanyan prosesləri gərginləşdirib. Azərbaycan resurslarına zərər dəyib və biz buna sakit baxa bilmirik. MDB liderlərinin ilin sonunda keçiriləcək sammitində bu məsələlərə münasibət bildirilməlidir”.

Qeyd edək ki, MDB-yə  Azərbaycan, Belarus, Ermənistan, Qazaxıstan, Qırğızıstan, Moldova, Özbəkistan, Rusiya və Tacikistan dövlətləri üzvdür.

Əzizə Zeynal