BMT-nin Baş katibi Laçın dəhlizindəki etiraz aksiyasına MÜNASİBƏT BİLDİRDİ
BMT-nin Baş katibi Antonio Quterreş Laçın dəhlizi ətrafında yaranmış vəziyyətə reaksiya verib.
Sfera.az bildirir ki, qurum rəsmisi baş verənlərdən narahatlığını ifadə edib və tərəfləri hərəkət azadlığını təmin etməyə çağırıb. Bu barədə beynəlxalq ictimaiyyətin inzibati rəhbərinin ofisinin yaydığı bəyanatda qeyd olunub.
“Baş katib Laçın dəhlizi ətrafında vəziyyətin inkişafını narahatlıqla izləyir. Quterreş tərəfləri gərginliyi azaltmağa və əvvəllər əldə edilmiş razılaşmalara uyğun olaraq dəhliz boyunca hərəkət azadlığını və təhlükəsizliyi təmin etməyə çağırır”, - deyə sənəddə bildirilib.
Sözügedən bəyanatda həmçinin baş katibin regiondakı problemlərin həlli üçün davamlı səyləri dəstəklədiyi də vurğulanıb.
Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.
Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.
Günay Rəsulqızı
