Ermənistan Xarici İşlər Nazirliyi dünən bəyanat yayaraq, Azərbaycan tərəfini Laçın yolunu bağlamaqda və üçtərəfli bəyanatı pozmaqda ittiham edib.

Sfera.az-ın məlumatına görə, bununla bağlı politoloq Turan Rzayev qeyd edib ki, Ermənistanın əsassız bəyanat irəli sürəcəyi, həm də erməni lobbisi və diasporunun xarici ölkələrdə aksiyaların məğzini təhrif edərək dezinfomasiya xarakterli iddialar ilə çıxış edəcəyi gözlənilirdi:

“Azərbaycan artıq erməni tərəfinin bu və ya başqa formada təxribatlarına, dezinformasiya yaymasına, hadisəni təhrif etməsinə alışıb. Buna görə də hər zaman erməni tərəfindən bir addım öndəyik. Məsələ ondadır ki, Bakı ermənilərin bu addımının qarşısını almaq üçün də müvafiq tədbirlər görüb”.

Ekspert sözügedən tədbirləri bu cür izah edib:

“Birincisi, Bakı rəsmi şəkildə elan etdi ki, ərazilərimizdə yaşayan bütün erməni sakinlərin humanitar ehtiyaclarını qarşılamağa hazırdır. Bu, ermənilərin “Azərbaycan Qarabağda “humanitar fəlakət” törədir” iddiasını çürütməyə kifayət edir. İkincisi, Azərbaycan ölkədə fəaliyyət göstərən diplomatik korpus nümayəndələrinə hadisə ilə bağlı lazımi məlumatları verib. Bu da öz növbəsində rəsmi Bakının İrəvanın yaratmaq istədiyi beynəlxalq təzyiqlərin qarşısını almağa yönəlib”.

Türkan