Lavrov Ceyhun Bayramova Alma-Ata bəyanaməsini xatırlatdı – Kreml nə planlayır?
Ötən gün Rusiyanın xarici işlər naziri Sergey Lavrov azərbaycanlı həmkarı Ceyhun Bayramovla görüşdə yenə Alma-Ata bəyannaməsindən danışıb. Lavrovun fikrincə, Azərbaycanla Ermənistan arasındakı sülh müqaviləsi məhz bu bəyannamə əsasında imzalanmalıdır. Rəsmi Bakı isə sülh sazişinin Alma-Ata bəyannaməsi ilə yanaşı BMT Nizamnaməsi əsasında imzalanması gərəkliyini bildirir.
Maraqlıdır, Moskvanın Alma-Ata bəyannaməsi üzərində israr etməsinin səbəbi nədir? Gözlənilən sülh müqaviləsi nə zaman imzalana bilər?
Bununla bağlı Sfera.az-a açıqlama verən politoloq Teymur Qasımlı xatırladıb ki, Praqa müzakirələrində Ermənistan tərəfi Azərbaycanın Alma-Ata bəyannəməsi ilə ərazi bütövlüyünü tanıdğını deyirdi:
“Amma o dövrdə, yəni bəyannamənin imzalandığı ərəfədə Xankəndi Dağlıq Qarabağ Muxtar Vilayətinin şəhəri idi. O cümlədən Xankəndidə hazırkı duruma oxşar proseslər gedirdi. Lavrovun Alma-Ata bəyannəməsi üzərində təkid etməsinin səbəbi bundan ibarətdir ki, onlar Dağlıq Qarabağ ətrafındakı ərazilərə status istəyirlər. Ona görə də buna qətiyyən yol vermək olmaz. Azərbaycan rəhbərliyi də bununla razılaşmır. Digər tərəfdən, Qarabağda yaşayan ermənilərin hüquqlarının təmin olunması, təhlükəsizliyi ilə bağlı zəmanət verilir və işlər də aparılır”.
Müsahibimiz Rusiyanın oyun oynadığını vurğulayıb:
“Bütün dünya Xankəndini bizim ərazimiz kimi tanıyır. Qaldı ki Azərbaycanla Ermənistan arasında sülh müqaviləsinə, yaxın perspektivdə bu, gözlənilmir. Hələ ki, bunun üçün çox işlər görülməlidir, həll edilməyən məsələlər çoxdur. 2023-cü ildə prosesləri izləyib fikir bildirmək olar”.
Günay Rəsulqızı
