Ermənistan parlamentinin Xarici Əlaqələr Komissiyasının sədri Eduard Ağacanyan Ermənistan tərəfinin dekabr ayı ərzində Azərbaycan Prezidenti İlham Əliyevlə görüşün təşkili üzərində işləyəcəyini deyib. Digər tərəfdən isə ölkə başçımız noyabrın 25-də keçirilən beynəlxalq tədbirdə dekabrın 7-də Brüsseldə keçirilməsi planlaşdırılan görüşün baş tutmayacağını açıqlayıb. Səbəb kimi də Ermənistan tərəfinin danışıqlarda Fransa prezidentinin iştirakında israrını göstərib.

Maraqlıdır, dekabrda Əliyev-Paşinyan görüşü baş tuta bilərmi?

Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov qeyd edib ki, Ermənistan tərəfi danışıqlarla bağlı müəyyən razılığa gəlməyə çalışır:

“Əslində Ermənistan Baş naziri Nikol Paşiyanın Fransa Prezidentini də bu görüşdə görmək istəməsi ilə bağlı açıqlaması nəbz yoxlanışı kimi də qiymətləndirilə bilər. Paşinyan bu sözləri deməklə danışlar masasına Makronu da cəlb edə biləcəyi ehtimalını müəyyənləşdirmək istədi. Lakin Azərbaycan Prezidentinin qəti etirazını görəndən sonra düşünürəm ki, Ermənistan danışıqlar prosesinin Fransasız davam etdirməyi planlaşdırır. Fikrimcə, dekabrda görüş baş tuta bilər, ilin bitməsinə hələ 25 gün qalıb. Bu isə Paşinyanın Fransa prezidentini görüşə cəlb etməmək istiqamətində açıqlama verməsindən sonra baş tuta bilər. Yaxud, bu, Ermənistan tərəfi rəsmi şəkildə Fransanın danışıqlarda iştirak etməyəcəyini bildirəndən sonra  mümkündür”.

Müsahibimiz bildirib ki, Fransa prezidenti olmadan danışıqlar prosesinin keçirilməsi həm də Avropa İttifaqının maraqlarına uyğundur:

“Çünki Avropa İttifaqı Şurasının Prezidenti Şarl Mişel bu günə qədər mümkün qədər çalışıb ki, öz iştirakı ilə üçtərəfli görüşlər baş tutsun. Fransanın iştirakı isə “məclisi pozmaq” kimi dəyərləndirilə bilər. Bu baxımdan hesab edirəm ki, Ermənistan parlamentinin Xarici Əlaqələr Komissiyasının sədri Eduard Ağacanyanın da açıqlaması hökumət daxilində hansısa razılaşmanın olduğunu göstərir. Yəni Fransa prezindeti olmadan da danışıqlar davam etdirilməlidir”.

Günay Rəsulqızı