Laçın dəhlizi uğrunda hərbi əməliyyat başlayacaq? – “Lazımdır, gecikirik...”
Son günlər erməni nəşrləri Laçın dəhlizi ətrafında problemlərin dərinləşməsindən yazır, Azərbaycanın ya yolu bağlayacağı, ya da orada nəzarət-buraxılış məntəqəsi yerləşdirəcəyi ilə bağlı narahatlıqlarını ifadə edirlər. Ermənistan mətbuatının iddiasına görə, Azərbaycan ordusu artıq Laçın yoluna nəzarəti almağa hazırlaşır.
Mövzu ilə bağlı Sfera.az-a açıqlama verən politoloq Rusif Məmmədsoy deyib ki, kimin nə deməsindən asılı olmayaraq, Laçın yoluna nəzarət hazırda ölkəmiz üçün prioritet olmalıdır:
“Qəbul etsək də, etməsək də həmin yol Qarabağın açarıdır. Əgər yola nəzarət bizdə olsaydı, bu gün Xankəndidəki mitinqi görmək, Xocalıdan, Xocavənddən ordumuzun atəşə tutulmasının şahidi olmaq məcburiyyətində qalmayacaqdıq. Hesab edirəm ki, yaxın zamanda növbəti əməliyyatların şahidi ola bilərik. Bu günlərdə Müdafiə Nazirliyinin Rusiyaya yönəlik açıqlamalarını da məhz bu cür başa düşmək lazımdır. Problem Rusiyadır və biz bunu açıq etiraf etməyə başlamışıq”.
Müsahibimiz hesab edir ki, bu məsələnin həllində yubanırıq:
“Təəssüf ki, bəzi məsələlərdə gecikirik. Rusiya Ukraynada yetərincə güc itirib, beynəlxalq müstəvidə reytinqi düşüb. Bundan maksimum şəkildə istifadə etmək lazımdır. Ruslar Qarabağda potensial savaş üçün gözümüzün qarşısında ordu saxlayır, təlimlər keçirir, Xankəndini ruslaşdırmaq hədəfindədirlər. Buna görə də Azərbaycan ordusu hər şeyə rəğmən hərəkətə keçməlidir”.
Günay Rəsulqızı
