"Cənubi Qafqazın tarixində yeni səhifə aça bilərik” - ABŞ-ın ATƏT-dəki səfiri

ABŞ-ın ATƏT-dəki səfiri Maykl Karpenter bildirib ki, ABŞ Azərbaycan-Ermənistan sülh prosesində dərindən iştirak edir və sülh müqaviləsinin bağlanmasında son dərəcə maraqlıdır.

Sfera.az-ın məlumatına görə, ABŞ-ın Ermənistan və Azərbaycan arasında razılıq əldə etmək üçün diplomatik səyləri barədə sualı cavablandıran M.Karpenter "bu ölkələrin liderlərini yaxınlaşdırmaq yollarını axtarmağa davam edəcəyik" ,- deyə bildirib.

“Heç kimə sirr deyil ki, ABŞ və onun Aİ-dəki tərəfdaşları Azərbaycanla Ermənistan arasında sülhün təmin olunması prosesi üzərində çox yaxından işləyir və Azərbaycan-Ermənistan sərhədinə müşahidəçilər göndərməklə ATƏT-in potensialından istifadə etmək imkanını nəzərdən keçirir”,- amerikalı diplomat qeyd edib.

“Məqsədimiz bəllidir. Biz istərdik ki, sərhəd ən qısa zamanda müəyyən edilsin. İstərdik ki, iki tərəf tezliklə sülh müqaviləsi üzərində razılaşsın ki, bölgəyə sülh və sabitlik qayıtsın, bu bölgədə yaşayan bütün insanların hüquq və təhlükəsizliyinə hörmət edilsin və biz Cənubi Qafqazın tarixində yeni səhifə aça bilək”, - Karpenter vurğulayıb.

Əzizə