Almaniyanın federal kansleri Olaf Şolz Berlində keçirilən iqtisadi forumda çıxış edərək Avropada enerji böhranının aradan qaldırılması perspektivlərini açıqlayıb.

Sfera.az xarici mətbuata istinadən bildirir ki, Olaf Şolz Almaniya və Qərb ölkələrinin Rusiyadan enerji asılılığından dərs çıxarmalı və iqtisadiyyatlarını şaxələndirməli olduğunu vurğulayıb. O, xüsusilə qeyd edib ki, Aİ-nin Çindən asılılığını azaltmağa çalışmaq və Rusiya ilə yol verilən səhvləri təkrarlamamaq lazımdır. Şolz açıq şəkildə bəyan edib ki, avropalıların və Şimali Amerika ölkələrinin bütün iqtisadi şərtlərin ən yaxşısından istifadə edə biləcəyi xoşbəxt dövrlər artıq geridə qalıb.

Rusiya-Ukrayna müharibəsi və pandemiyanın nəticələri əsas iqtisadi göstəricilərə təsir etdiyi üçün sabit artım, aşağı inflyasiya və yüksək məşğulluq keçmişdə qalıb. Eyni zamanda, Asiya regionunda, xüsusən də Çin, İndoneziya və Vyetnamda iqtisadi artım nəzərə çarpır. Bu regionlarda bir milyard insan müvafiq alıcılıq qabiliyyətinə malik orta təbəqəyə yüksəlib.

Şolza görə bu, inflyasiyanın əsas səbəblərindən biridir. Almaniya kansleri deqlobalizasiyanı təhlükəli və yanlış yol hesab edir. Şolz qeyd edib ki, Almaniya və Qərb ölkələri Rusiya və enerjidən silah kimi istifadə edən Putinin aqressiv siyasətindən dərs alaraq iqtisadiyyatı şaxələndirməli olurlar. Onun sözlərinə görə, Almaniya əvvəl Rusiya qazından asılılıq yaşayıb, ona görə də bu səhv ikinci dəfə təkrarlanmayacaq.

Bu o deməkdir ki, hər şeydən əvvəl yeni təchizat mənbələri və bazarlar tapmaqla Çindən asılılıq azaldılmalıdır.

Xatırladaq ki, Çin lideri Si Tsinpin və Almaniya kansleri Olaf Şolz arasında görüş zamanı Çin lideri Avropanın ABŞ-dan daha müstəqil olmasını arzuladığını bildirmişdi. Onun sözlərinə görə, Çin Avropa ölkələrinin Pekinlə hazırda izlənilən inkişaf vektorunu saxlamasında maraqlıdır.

Qeyd edək ki, Olaf Şolz ötən ay Aİ-nin şərqə doğru genişlənməsinin Avropa ölkələrinin böyük qələbəsi olduğunu vurğulamışdı.

Aynil

Sfera.az