ABŞ Prezidenti Cozef Bayden Polşaya düşən raketin Rusiya tərəfindən buraxılma ehtimalının az olduğunu deyib.

Sfera.az xəbər verir ki, ABŞ prezidenti Bayden Polşaya raket düşməsindən sonra İndoneziyada dünya liderləri ilə görüşüb. Görüşün ardından jurnalistlərin suallarını cavablayarkən bir jurnalistin “Raketin Rusiya tərəfindən buraxıldığını demək tez deyilmi?” sualına  Bayden “İlkin məlumatlarımız bu nəticəni vermir. Raketin Rusiyadan buraxılma ehtimalı çox azdır” deyə cavab verib.  

Yüksək vəzifəli ABŞ rəsmiləri də bildiriblər ki, ilkin tapıntılar Polşaya düşən raketin rus raketinin qarşısını almaq məqsədi ilə atılan “Ukrayna raketi” olduğuna işarədir. 

Qeyd edək ki, ötən gün Rusiya kritik infrastrukturu məhv etmək üçün Ukrayna ərazisinə kütləvi raket hücumu həyata keçirib, bundan sonra Polşa-Ukrayna sərhədindən 8 km aralıda yerləşən kənd ərazisinə Rusiya istehsalı mərmi düşüb. Raketin Polşa ərazisinə düşməsi nəticəsində 2 nəfər həyatını itirib və Polşa Milli Təhlükəsizlik Komitəsi təcili toplanaraq “Qoşunların döyüş hazırlığının artırılması” barədə qərar qəbul edib.

Sevinc Nəsirli