Erməni təxribatları niyə səngimir? - “Paşinyan Ukrayna savaşının bitməsini gözləyir”

“Ermənistan baş naziri Nikol Paşinyan Azərbaycanın diktə etdiyi yeni reallıqları qəbul etsə də, yekun sülh müqaviləsi üçün vaxtın uzanmasını, Rusiya ilə Ukrayna arasında savaşın başa çatmasını gözləyir”.

Bunu Sfera.az-a açıqlamasında siyasi şərhçi Kənan Novruzov son günlərdə sərhəddə artan erməni təxribatlarına münasibət bildirərkən deyib. O, qeyd edib ki, belə bir vaxtda üçüncü güclərin, o cümlədən Parisin mövqeyi İrəvan üçün “nəfəslik” rolunu oynayır:

“Ermənistan hələ “dalan”da olduğunu anlamır və alternativlərinin mövcudluğuna inanır. Başqa yolunun olmadığını anlaması üçün isə İrəvana təzyiqlər artırılmalıdır. Rəsmi Bakı İrəvanın hərbi-siyasi müstəvidəki sabotaj cəhdlərinə adekvat cavab verməlidir. Azərbaycanın Ermənistanın havadarları, o cümlədən Fransa ilə normal münasibəti var. Paris və digər Qərb dövlətləri Bakı ilə münasibətlərə xüsusi önəm verirlər, çünki Azərbaycan bu gün əsas regional oyunçudur. Qərb dövlətləri bilirlər ki, Azərbaycanın maraqlarını nəzərə almasalar, onların regiondakı mövcudluqları xeyli çətinləşəcək. Üstəgəl, tərəflər arasında iqtidadi əlaqələr də nəzərə alınmalıdır. Bu mənada Qərb heç bir halda Bakı ilə əlaqələri İrəvana qurban verməz”.

Ekspert qeyd edib ki, Azərbaycan Ermənistana təzyiqləri artırarsa, Qərb dövlətləri sonadək qarşı tərəfi dəstəkləməyəcək:

“İkinci Qarabağ müharibəsi günlərində olduğu kimi, uzaqbaşı ilk mərhələdə “suları bulandırmağa” çalışacaq, sonra isə reallıqları qəbul etməli olacaqlar. Rəsmi Paris kimi dövlətlər də Bakının qətiyyətini anlayacaqlar. Odur ki, bu cür provokasiyalara son qoymaq və regional maraqlarımızın təmin olunmasından ötrü yeganə yol Ermənistanın sıxışdırılmasıdır”.

Günay Rəsulqızı