Erməni müxalifətinin növbəti FİASKOSU: “Paşinyan gördü ki..”
Ötən günlərdə Ermənistan müxalifəti İrəvanın Fransa meydanında mitinq təşkil edib. Mitinq təşkilatçıları imzalanması ilin sonuna qədər nəzərdə tutulmuş Azərbaycanla Ermənistan arasında sülh müqaviləsinə qarşı çıxmaq üçün bu addımı atıb.
Bununla bağlı Sfera.az-a danışan politoloq Əlimusa İbrahimov deyib ki, müxalifət bu mitinqə çox böyük ümid bəsləyirdi:
“Mitinqdə növbəti dəfə Azərbaycan, Türkiyə, Rusiya əleyhinə şüarlar səsləndirildi. Sülh müqaviləsinin imzalanmasına, sərhədlərin delimitasiya və demarkasiyasına, Zəngəzur dəhlizinə qarşı çıxışlar edildi. Nümayiş erməni kütləvi informasiya vasitələrində geniş işıqlandırıldı, amma həm mitinq iştirakçıları, həm də KİV-in birbaşa reportaj aparan nümayəndələri əsas məsələ haqqında məlumat verməyi unutdular. Bu da mitinqdə iştirak edənlərin sayı idi. Ora toplananların sayı o qədər az idi ki, təşkilatçılar bunu göstərməkdən utandılar. Çünki bu say onların bu və qarşıdakı cəhdlərinin alnmayacağının əyani sübutu idi”.
Müsahibimiz Ermənistan müxalifətinin bu dəfə elə ermənilər tərəfindən “sındırıldığını” vurğulayıb:
“Bu mitinqdə daha az adam toplanmasının səbəbi var. Belə ki, əvvəlki mitinqlərdə iştirak edən ermənilərin nəzərəçarpacaq hissəsi artıq Ermənistanı tərk etməyə imkan tapıb. Beləliklə, 5 noyabrda İrəvanda müxalifət qüvvələrinin “Müqavimət” hərəkatının təşkil etdikləri mitinq baş tutmadı. Yəni mitinq təşkilatçıların ümidlərini doğrultmadı. Bu mitinq həm də Paşinyanın mövqelərini gücləndirmək baxımdan əhəmiyyətli oldu. O gördü ki, müxalifət getdikcə zəifləyir. Paşinyanın əleyhinə təşkil olunan mitinq onun işinə yaradı. Millət mitinqə gəlmədi və kütləvi nümayiş deyil, küçə gəzintisi alındı. Xalq növbəti dəfə Köçəryan-Sarkisyan tandeminin əsarəti altına düşmək istəmir. Paşinyan hakimiyyəti, onun yeritdiyi siyasət erməni kütlələri üçün daha məqbuldur, nəinki, ondan əvvəlki prezidentlərin apardığı siyasət”.
Günay Rəsulqızı,
Sfera.az
