“Əvvəlcə Asim Mollazadənin özü psixoloji testdən keçsin...” – Partiya sədrlərindən  ETİRAZ

Millət vəkili  Asim Mollazadə yeni təsis edilmiş partiyaların rəhbərlərinin psixoloji testdən keçməli olduğunu deyib.

Deputat parlamentdə “Siyasi partiyalar haqqında” yeni qanun layihəsinə dair dinləmələrdə bu testin sonradan yaranacaq fəlakətlərin qarşısının alınması üçün lazım olduğunu bildirib.

Sözügedən təkliflə bağlı Sfera.az-a danışan Ağ Partiya sədri Tural Abbaslı Asim Mollazadənin özünün testdən keçməli olduğunu düşünür:

“Əgər bu təklif partiya sədrlərinin psixoloji testdən keçirilməsi üçün nəzərdə tutulubsa, o zaman həm yeni, həm də köhnə partiyaların sədrləri testdən keçirilməlidir. Əvvəlcə Asim Mollazadə özü psixoloji testdən keçsin, nəticələri ortaya qoysun, sonra təklif irəli sürər. Bu, əsassız, mənasız, söz xətrinə deyilmiş sözdür. Çünki hətta Azərbaycanın seçki qanunvericiliyində parlamentin özünə keçirilən seçkilərdə belə namizəddən psixoloji test istənilmir.

Hazırkı vəziyyətdə Asim müəllim parlamentdə təmsil olunur və deputatdır, qanun yaradıcılığında iştirak edir, qərarlar qəbul edir. Onun psixoloji vəziyyətini testdən keçiriblər? Gündəm dəyişmək, söz xətrinə söz demək lazım deyil. Seçki qanunvericiliyində müəyyən qədər boşluqlar var, danışılmalı, müzakirə aparılmalı məsələlər var, bunlardan danışmaq lazımdır”.

Azərbaycan Demokrat Partiyasının (ADP) sədri Sərdar Cəlaloğlu isə deputatın təklifi ilə bağlı Ədliyyə Nazirliyinin münasibət bildirməli olduğunu deyib:

“Gərək buna Ədliyyə Nazirliyi cavab versin ki, psixoloji testlərə ehtiyacı olan adamları qeydiyyatdan keçirib, ya yox? Məncə, bu, tamamilə uğursuz təklifdir. Azərbaycan siyasəti üçün yolverilməz bir müzakirələrdir. Düşünürəm ki, bu müzakirələr cəmiyyətimiz haqda yanlış təsəvvürlərin formalaşmasına səbəb ola bilər. Bu təklif düşmən qüvvələrin bu cür düşünülməmiş fikirlərdən ölkəmizə qarşı təbliğatda sui-istifadəsinə gətirib çıxara bilər”.

Sevinc Nəsirli