Dövlət Təhlükəsizliyi Xidmətinin İran kəşfiyyatının nəzarəti altında yaradılmış və Azərbaycana qarşı olan qanunsuz silahlı birləşməni ifşasından sonra Azərbaycan tərəindən atıla biləcək addımlar, Azərbaycan-İran diplomatik münasibətlərinin bundan sonrakı vəziyyəti suallar yaradır.

Mövzu ilə bağlı Sfera.az-a danışan Beynəlxalq Münasibətlərin Təhlili Mərkəzinin sədri Fərid Şəfiyev baş verənlərlə bağlı Azərbaycan Xarici İşlər Nazirliyinin ortaya mövqe qoyacağını bildirib:

"Yəqin ki, Xarici İşlər Nazirliyi bəyanat yayacaq. Əgər gərginlik davam edərsə, təbii ki, burada müxtəlif addımlar ola bilər. Məsələn, səfirliyin şüar gətirən diplomatı, yaxud səfirliyin digər işçiləri ilə bağlı ölkədən çıxarılma qərarı veriləcək. Lakin bu, sərt addım olaraq nəzərdə tutulur. Düşünürəm ki, məsələ hələlik danışıqlar səviyyəsində həll edilməyə çalışılacaq”.

Müsahibimiz İran tərəfinin bu məsələ ilə bağlı rəyinin önəmli olduğunu da sözlərinə əlavə edib.

“İndi çox şey İran tərəfinin reaksiyasından asılıdır. Adətən belə hadisələr olanda səfir Xarici İşlər Nazirliyinə çağırılır, ona etiraz bildirilir. Odur ki, səfir Seyid Abbas Musəvi nazirliyə çağırılaraq ona Vyana Konvensiyasını pozması və qeyri-qanuni fəaliyyətlə məşğul olması xatırladıla bilər", F.Şəfiyev diqqətə çatdırıb.

Əzizə Zeynal