İran TƏKZİB EDİR: “Rusiyaya silahları müharibədən əvvəl satmışıq” 

İranın xarici işlər naziri Hüseyn Əmir Abdullahian Rusiyanın savaşda istifadə etdiyi silahlarla bağlı yayılan məlumatlara reaksiya verib.

Sfera.az bildirir ki, nazir paytaxt Tehranda keçirilən Asiya və Sakit Okean Ölkələri Xəbər Agentlikləri Assosiasiyasının (OANA) iclasında çıxış edib.

Abdullahian İranın Ukrayna müharibəsində istifadə etməsi üçün Rusiyaya silah göndərmədiyini bildirərək, bu istiqamətdəki iddiaları bir daha təkzib edib:

“Ukrayna müharibəsindən əvvəl Rusiyaya silah göndərmişdik. Müharibənin başlaması ilə biz Rusiyaya silah göndərməyi dayandırdıq. İran da prinsipcə Ukrayna müharibəsinin əleyhinədir. Bir daha deyirəm ki, Rusiyaya silahlı pilotsuz uçuş aparatları (SPUA) və ya raket göndərməmişik və göndərməyəcəyik. Biz bu məsələyə aydınlıq gətirmək üçün Ukrayna ilə işləməyə hazırıq”.

Sözügedən iddiaların araşdırılmasını da istəyən Abdullahian “İran və Ukraynadan olan ekspert qrupu ilə birgə iclas keçirməyə və Ukraynanın əlində olan bütün sübutları təqdim etməsinə hazırıq. Bu görüşdə Rusiyanın İran SPUA-larından istifadə etdiyi aydınlaşsa, biz buna biganə qalmayacağıq”.

Günay Rəsulqızı,

Sfera.az