İlham Əliyevlə Paşinyan Səmərqənddə görüşəcək? – Rusiya mediasından İDDİA
Sentyabrın 15-16-da Özbəkistanın Səmərqənd şəhərində keçiriləcək Şanxay Əməkdaşlıq Təşkilatının (ŞƏT) sammitində qonaq qismində Azərbaycan Prezidenti İlham Əliyev və Ermənistanın Baş naziri Nikol Paşinyan da iştirak edəcək.
Mövzu ilə bağlı Sfera.az-a açıqlama verən politoloq Əlimusa İbrahimov deyib ki, bununla əlaqəli xüsusilə Rusiya kütləvi informasiya vasitələri məlumatlar dərc edir və hətta üçtərəfli görüşün olacağını da yazırlar:
“Təbii ki, prezident İlham Əliyevin Şanxay Əməkdaşlıq Təşkilatının sammitində iştirakı təqdirəlayiq haldır. Burada Rusiya prezidenti Vladimir Putin, Ermənistan Baş naziri Nikol Paşinyan və Azərbaycan prezidenti İlham Əliyev arasında görüşün baş tutması yüksək ehtimaldır. Bildiyiniz kimi, Brüsseldə keçirilən görüşdən sonra Rusiyanın da belə bir görüş keçirməsi gözlənilirdi. Həm Əliyevin, həm də Paşinyanın Rusiyaya dəvət olunması, orada görüş keçirməsi bir qədər məntiqə uyğun olmazdı. Bu, müxtəlif şayiələrə səbəb olardı ki, Brüsseldən sonra Rusiya da buna cəhd edir. Amma Rusiya KİV-ləri bu görüşün keçirilməsini istisna etmirdilər. ŞƏT-in tədbirində liderlərin bir araya gəlməsi həm də təsadüf nəticəsində olan görüş kimi diqqəti cəlb edəcək, xüsusi zamanlanmış görüş kimi deyil”.
Müsahibimiz qeyd edib ki, Putin burada görüş keçirməklə “bir güllə ilə iki dovşan vurmuş” olur:
“Yəni həm Brüsselin keçirdiyi görüşə cavab olaraq Azərbaycan və Ermənistan dövlət rəhbərlərinin görüşünü təşkil edir, həm də fürsətdən istifadə edərək iki ölkə arasında olan münasibətlərin normallaşması üçün öz sözünü deyir, təklif və istiqamətlərini göstərir. Əlbəttə, görüşdə müzakirəyə çıxarılacaq hadisələr çox maraqla izlənilir. Bunlar nə ola bilər? Təbii ki, Azərbaycan və Ermənistan arasında olan məsələlər. Məlumdur ki, sülh müqaviləsinin imzalanması gündəmdədir və Avropadan bu barədə məlumatlar veriblər. Hesab edirəm ki, bu istiqamətdə müəyyən danışıqlar aparılacaq, bundan sonra məlumat veriləcək ki, tədbirdə baş tutan görüşdə sülh müqaviləsi istiqamətində artıq müəyyən addımlar atılıb. Brüssel görüşündən sonra Paşinyan bədbin fikirlər səsləndirir və deyirdi ki, hər şey müzakirə olunmayıb. Sözügedən tədbirdə ümumiyyətlə çoxlu məsələlər gündəmdə olsa da, Azərbaycan və Ermənistan arasındakı görüşdə kommunikasiyaların açılması, sülh müqaviləsi və sərhədlərin delimitasiya və demarkasiyası məsələləri müzakirə olunacaq”.
Günay Rəsulqızı
