“Rusiya məğlub olacaq, amma parçalanmayacaq...” - Açıqlama

“Rusiyanın gec ya tez məğlub olacağı ehtimalı çox yüksəkdir”.

Sfera.az bildirir ki, bunu “Şərq-Qərb” Araşdırmalar Mərkəzinin rəhbəri, politoloq Ərəstun Oruclu deyib. Onun sözlərinə görə, Rusiyanın parçalanması isə inandırıcı görünmür:

“Parçalansa belə silah gücünə, milyonların həyatı bahasına hamısını qaytarıb geriyə yığacaqlar. Buna dair tarixi təcrübələri də var. Ümumiyyətlə, Rusiyanın işğalçı ordusu son günlər Ukraynada ağır itkilərə yol verir. Putin isə deyir ki, Rusiya Ukraynada "xüsusi hərbi əməliyyat" keçirməklə heç nə itirməyib. Sanksiyalar, onların gələcək fəsadları, hərbi texnika itkiləri anlaşılandır. Amma "heç nə" dedikdə yüksək ehtimalla qətlə yetirilmiş minlərlə Rusiya hərbçisi nəzərdə tutulur”.

Ekspert həmçinin Putinin bir neçə gün əvvəl Rusiyanın yeni xarici siyasət doktrinasını imzaladığını xatırladıb:

“İndi Rusiya xarici siyasətinin əsas hədəflərindən biri xarici ölkələrdəki rus və rusdilli əhalinin qorunmasıdır. Ukraynaya qarşı işğalçı müharibə başlayandan on minlərlə rus postsovet ölkələrə miqrasiya edib. Belə çıxır ki, bir gün də Rusiya ordusu onların hüquqlarını qorumaq üçün həmin ölkələrə "miqrasiya" edəcək. Ən azı, bunu edə bilər, çünki yeni xarici siyasət doktrinası buna hüquqi zəmin yaradır. Söhbət əlbəttə, Rusiya anlamında hüquqi zəmindən gedir”.

Türkan