“Ermənilər İkinci Qarabağ savaşından sonra da Azərbaycan torpaqlarına mina basdırmaqda davam edirlər”.

Sfera.az bildirir ki, bunu Milli Məclisin deputatı Sahib Alıyev deyib. Millət vəkili xatırladıb ki, avqustun 3-də qanunsuz silahlı birləşmələrdən təmizlənən Sarıbaba yüksəkliyi yaxınlığında da “mina tarlaları” tapılıb.

“Oradan çıxarılıb zərərsizləşdirilən 991 ədəd mina 2021-ci ildə Ermənistanda istehsal olunub. Fikrimcə,  Laçınla yanaşı, digər yerlərdə də bu cür "tarla"ların olması mümkündür. Belə bir məsəl var - “Nə əkərsən, onu da biçərsən”. Yəqin Ermənistan ordusunun Qarabağdakı tör-töküntülərinə və oradakı separatçı ünsürlərə bu mənzərənin niyə yarandığını xatırlatmaq lazım gələcək. Onlar Azərbaycan torpaqlarına əkdiklərini  biçməli olacaqlar, ya da avqustun 3-dəki kimi özləri biçiləcəklər”.

S.Alıyev qeyd edib ki, Rusiyanın Qarabağdakı hərbi kontingentinin hayların Ermənistandan Qarabağa mina daşıyıb basdırmalarından xəbərsiz olmaları isə heç inandırıcı deyil:

“Rusiya hərbi kontingentinin rəhbərliyi mütləq bu suala cavab verməlidir. Əgər məramları doğrudan da Qarabağda sülh yaratmaqdırsa,  iki ilə yaxındır sülhməramlılar hayların reinteqrasiyası, eləcə də azərbaycanlıların Xankəndinə, Xocalıya və müvəqqəti nəzarətləri altında olan digər yerlərə qayıdıb yaşamaları üçün nə ediblər? Kiçik də olsa bir hazırlıq görüblərmi?”.

Günay Rəsulqızı