İlham Əliyev daha iki ölkənin səfirlərini qəbul etdi - FOTOLAR + YENİLƏNİB
Azərbaycan Respublikasının Prezidenti İlham Əliyev avqustun 16-da Almaniya Federativ Respublikasının ölkəmizdə yeni təyin olunan fövqəladə və səlahiyyətli səfiri Ralf Horlemannın etimadnaməsini qəbul edib.
Sfera.az xəbər verir ki, etimadnaməsini Prezident İlham Əliyevə təqdim edən səfir Ralf Horlemann deyib: “Salam, cənab Prezident, sabahınız xeyir”.
Prezident İlham Əliyev: “Salam əleyküm, sabahınız xeyir”.
Səfir Ralf Horlemann: “Almaniyanın ölkənizdə növbəti səfiri olmaq mənim üçün böyük şərəfdir. Sizinlə və hökumətinizlə əlaqələrimizi daha da inkişaf etdirib genişləndirməyi səbirsizliklə gözləyirəm”.
Prezident İlham Əliyev: “Təşəkkür edirəm”.
Səfir Ralf Horlemann: “Ölkənizdə böyük səmimiyyətlə qarşılandığıma görə Sizə çox minnətdaram. Bizim ölkələrimiz arasında çox geniş münasibətlər var və bizi qarşıda çoxlu iş və bir çox fürsət gözləyir”.
Prezident İlham Əliyev: “Bəli, haqlısınız. Bizim çox geniş gündəliyimiz var və əməkdaşlığın yaxşı tarixi var. Bildiyiniz kimi, alman şirkətləri Azərbaycanda çox geniş təmsil olunub və əminəm ki, onların fəaliyyəti daha da geniş olacaq. Bizim yüksək səviyyəli səfərlərimiz və çox yaxşı siyasi əlaqələrimiz var. Əlbəttə, biz yeni fürsətlərin nədən ibarət olduğunu görməliyik. Çünki Almaniya ilə Azərbaycan arasında ikitərəfli əlaqələr region üçün və həmçinin ölkələrimiz üçün çox mühümdür”.
Azərbaycan-Avropa İttifaqı əlaqələrinə toxunan Prezident İlham Əliyev bu əlaqələrin inkişafında Almaniyanın xüsusi rolunu qeyd edərək deyib:
“Biz Avropa İttifaqı-Azərbaycan ikitərəfli gündəliyinə verdiyiniz bütün dəstəyə görə minnətdarıq. Bu gündəlik getdikcə genişlənir və bir çox sahələri əhatə edir. Sizin xanım Ursula Fon der Lyayenin çox uğurlu səfərindən və bizim konstruktiv danışıqlarımızdan xəbəriniz var”.
Prezident İlham Əliyev Avropa İttifaqı ilə əməkdaşlığın müxtəlif sahələrdə, o cümlədən energetika, nəqliyyat və nəqliyyat dəhlizləri, ticarət, investisiya sahələrində geniş perspektivlərə malik olduğunu vurğulayıb. Azərbaycan ilə Avropa Komissiyası arasında enerji dialoquna start verildiyini qeyd edən dövlət başçısı bu dialoqun təkcə qaz deyil, neft, hidrogen, elektrik enerjisi sahələrini də əhatə etdiyini bildirərək deyib:
“Azərbaycan enerji bazarında yalnız ənənəvi olan neft və qaz ilə deyil, həmçinin gələcəkdə elektrik enerjisi, neft, hidrogen və neft-kimya məhsullarının idxalı ilə çox önəmli oyunçuya çevrilməkdədir. Biz mühüm nəqliyyat infrastrukturunu vaxtında tamamladıq”.
Dövlət başçısı səfirin əməkdaşlığımızın genişləndirilməsi işində səylərini əsirgəməyəcəyinə ümidvar olduğunu bildirib.
Səfir Ralf Horlemann: “Tam səmimiyyətlə deyə bilərəm ki, mən bunu səbirsizliklə gözləyirəm. Çünki bu, bizim daha da inkişaf etdirə biləcəyimiz müsbət gündəlikdir. Siz doğru qeyd etdiniz ki, Almaniya və Azərbaycan geniş və çoxtərəfli münasibətə, konstruktiv siyasi dialoqa, güclü iqtisadi münasibətlərə malikdir. Azərbaycan Almaniyanın regionda ən mühüm iqtisadi tərəfdaşıdır. Biz enerji və bərpaolunan enerji sahələrində böyük potensial görürük”.
Söhbət zamanı Azərbaycanın işğaldan azad edilmiş ərazilərdə böyük miqyaslı mina problemi ilə üzləşməsi, Birinci Qarabağ müharibəsindən etibarən 4 min azərbaycanlının itkin düşmüş şəxs hesab edilməsi, həmçinin Azərbaycanın təşəbbüskarı olduğu və Cənubi Qafqazda davamlı sülhün və sabitliyin təmin olunmasına xidmət edən sülh gündəliyi məsələləri də müzakirə olunub.
Görüşdə işğaldan azad edilmiş torpaqlarımızda aparılan yenidənqurma və bərpa işləri barədə də fikir mübadiləsi aparılıb.
***
11:55
Azərbaycan Respublikasının Prezidenti İlham Əliyev avqustun 16-da Almaniya Federativ Respublikasının ölkəmizdə yeni təyin olunan fövqəladə və səlahiyyətli səfiri Ralf Horlemannın etimadnaməsini qəbul edib.
Sfera.az xəbər verir ki, bu barədə məlumatı Azərbaycan Prezidentinin Mətbuat xidməti yayıb.
Azərbaycan Respublikasının Prezidenti İlham Əliyev avqustun 16-da Argentina Respublikasının ölkəmizdə yeni təyin olunan fövqəladə və səlahiyyətli səfiri xanım Marianxeles Belluşinin etimadnaməsini qəbul edib.
Sfera.az xəbər verir ki, Argentina Prezidenti Alberto Fernandesin salamlarını və ən xoş arzularını dövlətimizin başçısına çatdıran səfir Marianxeles Belluşi etimadnaməsini Prezident İlham Əliyevə təqdim edib.
Dövlət başçısı səfirlə söhbət edib.
Prezident İlham Əliyev Alberto Fernandesin salamlarına və ən xoş arzularına görə minnətdarlığını bildirib, onun da salamlarını Argentina Prezidentinə çatdırmağı xahiş edib.
Ölkələrimiz arasında siyasi əlaqələrin çox yaxşı səviyyədə olduğunu bildirən dövlət başçısı ticari və iqtisadi sahələrdə də əməkdaşlığın genişləndirilməsinin zəruriliyini qeyd edib və bunun üçün yaxşı potensialın mövcud olduğunu deyib.
Bakıda olmaqdan məmnunluğunu ifadə edən səfir paytaxtımızın gözəlliyinin ona dərin təəssürat hissi bağışladığını vurğulayıb və ölkəmizdə çox böyük qonaqpərvərliyin şahidi olduğunu bildirib.
Səfir Marianxeles Belluşi iqtisadi–ticari əlaqələrin genişlənməsi və bu baxımdan əməkdaşlığın səhiyyə, texnologiyalar, kənd təsərrüfatı və digər yeni sahələrinin müəyyənləşdirilməsinin vacibliyini qeyd edib.
***
11:55
Azərbaycan Respublikasının Prezidenti İlham Əliyev avqustun 16-da Argentina Respublikasının ölkəmizdə yeni təyin olunan fövqəladə və səlahiyyətli səfiri xanım Marianxeles Belluşinin etimadnaməsini qəbul edib.
Sfera.az bu barədə məlumatı Azərbaycan Prezidentinin Mətbuat xidməti yayıb.
