“Mirzoyan mart ayından başlayaraq keçirdiyi bütün görüşlərdə “Minsk Qrupu danışıqlarda iştirak etməlidir” tipli bəyanatlar verir. Hazırda əsas müzakirə mövzusu Qarabağ deyil, Azərbaycan və Ermənistan sərhədlərinin delimitasiyası və Zəngəzur dəhlizidir. Bunu nəzərə alsaq, erməni tərəfinin ikitərəfli dialoqun müzakirə predmeti olmayan Qarabağ və Minsk qrupu mövzularını aktuallaşdırmağa cəhd göstərməsi birmənalı olaraq yenidən Bakı və İrəvan arasında müharibə riskini artırır”.

Bu sözləri Sfera.az-a açıqlamasında Bakı Politoloqlar Klubunun sədri Politoloq Zaur Məmmədov Ermənistanın XİN rəhbəri Ararat Mirzoyanın Rusiyanın xarici işlər nazirinin müavini Aleksandr Qruşko ilə etdiyi telefon söhbətini şərh edərkən deyib.

Onun sözlərinə görə, telofon danışığı zamanı Mirzoyan bir daha Minsk qrupu çərçivəsində "münaqişənin" nizamlanmasından bəhs edib:

“Belə bir nəticəyə gəlmək olar ki, İrəvan Qarabağ və kommunikasiya, delimitasiya məsələlərini bir - birindən ayırmaq istəsə də, Xankəndi məsələsində nəzərdə tutduğu qarantiyanı almaq istəyir. Azərbaycan - Ermənistan arasında sülh danışıqlarına mane olan amillər olduqca çoxdur. Ən əsası isə unutmamalıyıq ki, bu kimi münaqişələrin inkişaf və ya əksinə sülhə nail olma istiqamətləri böyük dövlətlərdən asılıdır. İlkin mərhələdə məhz Qərbi Zəngəzura qayıdış olduqca vacibdir. Bu gün Qarabağda ermənilərin hüquqlarından danışanlar qarşısında 1921-ci ilin 30 noyabr-1 dekabr qərarları ilə bolşeviklər tərəfindən Ermənistana verilən Qərbi Zəngəzura yerli əhali, çoxluq təşkil edən azərbaycanlıların qayıdışı məsələsi qabardılmalıdır. Qarabağ heç vaxt Ermənistanın tərkibində olmamışdır. Lakin, Qərbi Zəngəzur 1921-ci ilə qədər Azərbaycanın tərkib hissəsi olmuşdur. Bu gün Azərbaycan şəhəri Gorusda  konsulluq açmaq istəyən bəzi dövlətlər, o cümlədən BMT TŞ və beynəlxalq ictimaiyyət Qafqazın hər bir nöqtəsində tarixi ədalətin bərpa ediləcəyinə əmin olsunlar”.

Turan Rzayev