"Rusların Qarabağa qanunsuz silah daşınmasına şərait yaratdığı bəlli məsələdir. Bu fakt silahın birbaşa sülhməramlılar tərəfindən daşındığını təsdiq edir".

Bu sözləri Sfera.az-a açıqlamasında siyasi şərhçi Asif Nərimanlı Azərbaycan əsgərlərinin Rusiya sülhməramlılarına aid 1 ədəd 82A zirehli maşın və 3 ədəd “Ural” markalı avtomobili dayandırması və avtomobillərindən birindən 5 ədəd Kalaşnikov avtomatı aşkarlamasını şərh edərkən deyib.

Ekspertin sözlərinə görə, prosesin qarşısını almaq  və vəziyyətə nəzarəti ələ almaq üçün erməni terrorçuların yeni səngərinin havaya uçurulmasından başqa yol yoxdur:

“Karvanın saxlanılması Bakının bölgədə nəzarəti gücləndirməsindən xəbər verir. Bu hadisənin dövlət başçısı İlham Əliyevin son xəbərdardarlığından sonra olması da diqqətçəkən məqamdır. Onu da qeyd edim ki, erməni terrorçular Xocalıda rus sülhməramlılarının gözü önündə səngər qazırlar. Azərbaycan Ordusunun xəbərdarlıq atəşindən sonra əraziyə sülhməramlılar gəlib, lakin iş dayandırılmayıb. Rusların müşayiəti ilə gecə saatlarına qədər qazıntı işləri aparılıb”.

A. Nərimanlının sözlərinə görə, Separatçılar “müdafiə xəttini” gücləndirməyə hazırlaşırlar:

“Ruslar separatçı-terrorçu rejimin mövcudluğunu qorumaq üçün onların “müqavimət” fəaliyyətinin güclənməsinə şərait yaradırlar. Prosesin qarşısını önləmək və vəziyyətə nəzarəti ələ almaq üçün erməni terrorçuların yeni səngərinin havaya uçurulmasından başqa yol yoxdur”.

Turan Rzayev

Sfera.az