Bu ölkələr Avropa Birliyinə daxil olacaq, Gürcüstanda isə inqilab gözlənilir... – QƏRAR VERİLDİ
“Avropa Komissiyası Ukrayna, Moldova və Gürcüstana Avropa Birliyi üzvlüyünə namizəd statusunun verilib-verilməməsi barədə tövsiyə qərarını elan edib”.
Sfera.az xəbər verir ki, bunu siyasi məsələlər üzrə ekspert Şahin Cəfərli bildirib. O, Gürcüstanın adıçəkilən təşkilata üzv olmağa hazır olmaması ilə bağlı qənaətə gəlindiyini deyib:
“Komissiya iyunun 23-də toplaşacaq AB liderlər zirvəsinə rəsmən tövsiyə edib ki, Ukrayna və Moldovaya üzvlüyə namizəd statusu verilsin. Gürcüstanla bağlı qərar isə fərqli olub. Komissiya bu ölkəyə üzvlük perspektivi verilməsini tövsiyə etsə də, Gürcüstanın namizədliyə hazır olmadığı qənaətinə gəlib. Komissiya Gürcüstan hökuməti qarşısında siyasi və vətəndaş cəmiyyəti sahəsində vəziyyəti yaxşılaşdırmaqla bağlı şərt qoyub.
Bu qərar gözlənilən idi. Gücüstanda son illər demokratiya və insan haqları sahəsində geriləmə baş verib. Seçkilər dürüst keçirilmir, siyasi təqiblər var, ölkənin keçmiş prezidenti, islahatçı kimi tanınan Saakaşvili həbsdədir. Ötən ay ölkənin ən məşhur jurnalisti Nika Qvaramiyanın həbsi isə ümumiyyətlə, hökumətin avrointeqrasiya kursuna sadiqliyinə əsaslı şübhələr yaradır. Əvvəlcə Avropa Birliyinə üzvlük üçün rəsmi müraciət edib, sonra ən tanınmış müxalif jurnalisti həbs etmək yalnız təxribat kimi qiymətləndirilə bilər”.
Ekspert Gürcüstanda inqilab ola biləcəyinə diqqət çəkib:
“Gürcü Arzusu” ilə Qərb arasında qarşılıqlı etimadsızlıq mövcuddur. Avropa Parlamenti qəbul etdiyi qətnamədə Avropa Birliyini Bidzina İvanişviliyə sanksiya tətbiq etməyə çağırıb. Hələ sanksiya tətbiq olunmasa da, artıq Qərbdə İvanişvilinin bank əməliyyatlarına problemlər yaradılır.
Əgər hökumət Avropa Komissiyasının şərtlərini yerinə yetirməsə və ciddi yumşalmalara getməsə, Gürcüstanda gərginlik artacaq. Hətta inqilab ehtimalını da istisna etmək olmaz”.
Əzizə Zeynal
Sfera.az
