Seperatçı nazirin son açıqlamasındakı GİZLİ MESAJLAR: Rəsmi Moskva nə istəyir?

“Separatçılara Rusiya dövlət agentliyində platformanın verilməsinin Moskvanın tapşırığı olduğu bəllidir”.

Sfera.az bildirir ki, bunu siyasi şərhçi Asif Nərimanlı qondarma rejimin seperatçı “dövlət naziri” Artak Beqlaryanın “Ria Novosti”yə verdiyi müsahibədən danışarkən deyib. O qeyd edib ki, “Rusiya sülhməramlıları Qarabağda qeyri-müəyyən müddətə qalmalıdır və Avropa İttifaqı “münaqişənin” həllində iştirak etməməlidir”  kimi Beqlaryanın irəli sürdüyü fikirlər Rusiyaya məxsusdur:

“Rəsmi Moskva demək istədiklərini onların dili ilə səsləndirir. Məqsəd “Qarabağdakı etnik erməniləri” prosesdə de-fakto tərəf kimi legitimləşdirmək və Bakı-İrəvan danışıqlarına təsir rıçaqlarını genişləndirməkdir. Separatçılara “tərəf kimi” meydan verən Moskva birincisi, “Rusiya sülhməramlılarının bölgədə qeyri-müəyyən müddətdə qalmasını ermənilər istəyir” mesajını verir. İkincisi, Brüsselə “hüquqlarını qorumaq istədiyiniz etnik ermənilər Avropa İttifaqını yox, Rusiyanı istəyir” mesajı ötürülür. Burada Rusiyanın əsas hədəf ünvanı Brüsselin prosesdə aktivliyində və “ikitərəfli format”ın önə çıxmasında həlledici tərəf olan Azərbaycandır”.

Ekspert əlavə edib ki, Moskva Cənubi Qafqazda 44 günlük müharibədən sonra Ukraynaya hücumdan əvvəl mövcud olan vəziyyəti qaytarmaq üçün Bakıya “separatçıların legitimləşdirilməsi” təzyiqini edir:

“Bunun Əliyev-Putin danışığından sonra olması da xüsusi diqqət çəkir. İstisna deyil ki, Bakı Moskvadan üçtərəfli razılaşmaların sürətli icrasının sözdən əmələ keçməsinin vaxtının çatdığını, əks təqdirdə alternativin olduğunu izah edib. Moskva isə cavabı rəsmi informasiya resursunda separatçıları legitimləşdirmək mesajı ilə verir”.

Günay Rəsulqızı
Sfera.az