Azərbaycan və Ermənistan rəhbərliyi arasında baş tutan görüşlər, Zəngəzur dəhlizinin açılması ilə bağlı  xəbərlər sülh müqaviləsi ilə bağlı ümidləri artırır.
Bu isə öz növbəsində uzun illərdir ki, düşmən kimi yaşayan Azərbaycan və Ermənistan xalqı arasında qarşılıqlı, sabit münasibətlərin qurula biləcəyi ilə bağlı suallar doğurur.

Mövcud məsələ ilə bağlı Sfera.az-a danışan millət vəkili Arzu Nağıyev sülh içərisində yaşamağın yaxın zamanlarda reallaşmayacağını deyib. Deputat sabitliyin mümkünsüz olmadığını da diqqətə çatdırıb:

“Tarix göstərir ki, sülh prosesi bir-iki günə, yaxud bir aya baş verməyəcək. Bunu üçün  uzun zaman lazımdır. Əgər xalq diplomatiyası işləyərsə, maarifləndirmə yetərli səviyyədə olsa, o zaman birgəyaşayış da təmin oluna bilər. Onu da bildirməliyəm ki, müharibədə həm Azərbaycan tərəfi, həm də Ermənistan tərəfi itki verib. Bu yara mütləq sağalmalıdır. Bu yara sağalmamış demək olmaz ki, biz dinc quruculuq işində birgə çıxış edə bilərik, sabitlik bərqərar ola bilər. Hələ bir müddət keçməlidir. Bu müddət ərzində ermənilərin revanşist ideyaları, ərazi iddiaları olmasa, birgəyaşayış məsələsinə də qayıtmaq olar”.

Deputat yekun sülh müqaviləsi ilə bağlı məsələyə də aydınlıq gətirib:

“Ermənistan ərazi bütövlüyümüzü tanıdıqdan sonra sülh müqaviləsindən də danışmaq olar. Zənninmcə, bu da qarşıdakı yaxın zaman ərzində reallaşa bilər. Əgər sülh olarsa, tərəflər arasında münaqişə yaşanmazsa, o zaman sülhməramlıların da Azərbaycanda olmasına ehtiya qalmayacaq”.

Əzizə Zeynal 
Sfera.az