Növbəti 24 saat Ukrayna üçün həlledici olacaq – Şərh
"Ukrayna prezidenti Volodimir Zelenski Böyük Britaniyanın baş naziri Boris Consonla sonuncu telefon danışığından sonra növbəti 24 saatın Ukrayna üçün həlledici olacağını deyib. O, qeyd edib ki, İngiltərə baş naziri müttəfiqləri ilə birlikdə müdafiəni təşkil etmək üçün əlindən gələni edəcək”.
Sfera.az xəbər verir ki, bu sözləri siyasi şərhçi Asif Nərimanlı son prosesləri şərh edərkən deyib.
Onun sözlərinə görə, rəsmi Kiyev Qərbdən gözlədiyi silah yardımını, xüsusilə döyüş təyyarələri və hava hücumundan müdafiə sistemlərinin verilməsini tezləşdirmək istəyir:
"Müharibənin gedişi haqda məlumatlar da göstərir ki, mövqe döyüşlərində işğalçılara keçid verməyən Ukrayna ordusunun çətinliyi hava əməliyyatlarındadır. Hücumun beşinci günündə Putin generallarından ciddi nəticə tələb edir. Digər tərəfdən, Ukraynanın Qərbin verəcəyi silahlarla müdafiənin boşluqlarını doldurmasına imkan verməməyə çalışacaq. Rusiya bununla mümkün danışıqlar masasında üstün mövqe əldə etmək istəyir: hücumda istədiyi nəticəni əldə edə bilməyən Moskvanın şərtlərinin Kiyev tərəfindən qəbul edilməsi mümkünsüz görünür, əslində Zelenskinin dediyi "həlledici 24 saat” da bununla bağlıdır, çünki Putin danışıqlardan sonra hücumun təzyiqini daha da artıracaq. İstisna deyil ki, Ukrayna tərəfi cəbhədə müdafiəni gücləndirmək məqsədlə danışıqları uzatsın”.
Ekspert qeyd edib ki, bunun fonunda "Times” nəşrinin yaydığı məlumat diqqət çəkir:
"Putin "Vaqner” qrupunun 400 üzvünü Zelenski və Ukrayna hökumətinin bəzi nümayəndələrini öldürməsi üçün hərəkətə keçirib. Mövcud vəziyyətdə bunun Qərb mediasının iddiası olduğunu demək çətindir, çünki Putinin Ukrayna hakimiyyətini dəyişmək planında bu variantın da olduğu istisna deyil. Hücumun beşinci günündə də Kiyevin müdafiəsini yara bilməyən və yarmaq imkanı getdikcə çətinləşən Rusiya sui-qəsd ssenarisini işə salır”.Turan Rzayev
