Bakı və Ankaranın iki əsas vəzifəsi var

"Türkiyənin xarici işlər naziri Mövlud Çavuşoğlu dünən TRT-yə müsahibəsində Ermənistanla əlaqələrin normallaşması barədə danışıb. O bildirib ki, Azərbaycan Türkiyə ilə Ermənistan arasında diplomatik əlaqələrin bərpasını dəstəkləyir”.

Bu sözləri Sfera.az-a Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov deyib.

Onun sözlərinə görə, iki ölkə müxtəlif məqamlarda daim bir-birinə dəstək olub "Şuşa Bəyannaməsi" də bunun təzahürüdür:

"Çavuşoğlu, həmçinin azərbaycanlı həmkarı Ceyhun Bayramovun dəvəti ilə yaxın vaxtlarda Bakıya gələcəyini deyib. İndiki həssas məqamda şübhəsiz ki, belə intensiv təmaslara ehtiyac var. Nazirlərin görüşündə əsas müzakirə mövzusu əlbəttə Ermənistanla əlaqələr olacaq. Son vaxtlar müxtəlif erməni rəsmilər, o cümlədən baş nazir Nikol Paşinyan, xarici işlər naziri Ararat Mirzoyan müsbət mesajlar verir, sərhədlərin delimitasiya və demarkasiyasına hazır olduğunu deyirlər. İrəvanın səmimiliyinə inanmaq olar. Çünki başqa variantları yoxdur.

Paşinyan administrasiyasına mane olan Kremlin təzyiqləri, xofudur. Həmçinin nəzərə almaq lazımdır ki, bir neçə aydır ATƏT-in Minsk Qrupunun "reanimasyadan çıxarılması" ilə bağlı cəhdlər olur. Doğrudur, bu Rusiya üçün o qədər də arzuolunan deyil. Lakin artıq Moskva özü də başa düşür ki,  prosesləri təkbaşına "tormuzlada" bilmir”.

Ekspert hesab edir ki, Bakı və Ankaranın iki əsas vəzifəsi var:

"Rusiyanın proseslərə təsir imkanını minimuma endirmək və Minsk Qrupunun fəallaşmasına imkan verməmək. Belə olsa, Paşinyan administrasiyası daha qətiyyətli davranar və hətta yaxın gələcəkdə kommunikasiyaların açılması istiqamətində əməli addımlara start verilə bilər.

İki qardaş dövlət yuxarıdakı dediyimiz məqsədlərə çata bilsə, yəni Minsk Qrupun "oyundankənar vəziyyətdə" saxlayıb, Moskvanın təsir imkanlarını məhdudlaşdırsa, əvvələr də dediyimiz kimi, normallaşma əlaqələri daha sürətlə davam edəcək”.