Müstəqilliyimizdə və zəfərlərimizdə Azərbaycançılıq ideologiyasının rolu

 

30 yaş bir insan üçün yetişkinlik yaşı hesab edilsə də, dövlət üçün olduqca gənc bir yaşdır. Lakin ölkəmizin geridə qoyduğu bu 30 ilə nəzər salsaq görə bilərik ki, başına gələnlər, yaşadıqları və son illərdə etdikləri 100 illik ölkələr ilə eynilik təşkil edir. 

Müstəqilliyi əldə etmək, onu qorumaq və ağır siyasi proseslərdən keçərək bu günə qədər gətirmək heç də asan bir iş deyil. Təəssüf ki, müstəqilliyimizin ilk illəri xaos və siyasi anarxiyaya səhnə oldu, gərgin keçdi.  Ermənistanın işğalçılıq siysətinə məruz qalan ölkəmiz işğal, daxili bölünmə və müstəqilliyini itirmək riskləri ilə üz-üzə qaldı. 

Azərbaycanın müstəqilliyinin ilk illərində zəif olmasının bir çox səbəbi var. Lakin mənə görə bu səbəblərdən ən başlıcası məhz cəmiyyəti, xalqı, etnik-dini, cinsi mənsubiyyətinə ayırmadan bir arada saxlaya biləcək ümumxalq ideologiyasının olmaması idi.  Lakin müasir müstəqil Azərbaycan dövlətinin banisi, xalqımızın Ümummilli Lideri Heydər Əliyev daxildən parçalanmış, müstəqiliyini itirmək təhlükəsi ilə üz-üzə qalmış bir ölkənin nəyə ehtiyacı olduğunu yaxşı anlayırdı. Heydər Əliyev Azərbaycançılıq ideologiyası adı altında xalqı bir araya gətirdi. Nəticə isə çox keçmədən özünü bariz şəkildə büruzə verdi. Daxildəki siyasi sabitlik təmin edildi. Separatçı etnik ünsürlər yatırıldı. İşğala qarşı başsız qalan və ayrı-ayrı yerlərdə özünü müdafiə batalyonları yaradan xalq milli ordu nəzdində bir araya gəldi. Məhz bu ideologiya sonrakı illərdə işğalın genişlənməsini dayandırdı. 

Heydər Əliyev siyasi məktəbinin layiqli davamçısı Müzəffər Ali Baş Komandan İlham Əliyev Azərbaycançılıq ideologiyasına sadiq qalaraq siyasi kursunu bu yöndə formalaşdırdı. Vaxtilə Heydər Əliyevin başçılığı ilə işğalı dayandıran Azərbaycan xalqı İlham Əliyevin rəhbərliyi ilə 44 günlük müharibə ilə həmin işğala son verdi. 

44 günlük müharibə bu ideologiyanın yaşadığını, inkişaf etdiyini, xalqın ayrılmaz parçası olduğunu bir daha sübut etdi. Xalq bu ideologiya altında 44 günlük müharibə zamanı talış, ləzgi, türk, kürd, tat, udin və ya xristian, yəhudi, müsəlman demədən cəbhəyə axışıb çiyin-çiyinə döyüşdü. Arxa cəbhədə sadə insanlar informasiya müharibəsinə, ön cəbhəyə yardıma qalxdı. 30 illik müstəqillik tariximiz 44 günlük müharibə gedişində bir daha özünü biruzə verdi.

 

 

 

Qeyd: Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanıb.

Mövzu: Azərbaycançılıq ideyasının təbliği: dövlət müstəqilliyimizin bərpasının 30-cu ili – azərbaycançılıq ideologiyası bizi birləşdirən əsas dəyərdir