Azərbaycanın İsveçrə Konfederasiyasındakı səfiri Əkrəm Zeynallının həmin ölkənin "Neue Zürcher Zeitung” qəzetində "Dağlıq Qarabağla bağlı şərhlər” adlı məqaləsi çap edilib.

XİN-in mətbuat xidmətindən Sfera.az-a verilən məlumata görə, məqalə Stefan Müllerin sözügedən qəzetdə çap edilmiş "Mübahisəli Dağlıq Qarabağ: Qafqazın düyünü” adlı qərəzli məqaləsinə cavab olaraq yazılıb.

Məqalədə Ə.Zeynallı 2016-cı ilin aprelində Ermənistan silahlı qüvvələrinin cəbhə xətti boyunca yaşayış məntəqələri və mülki əhalini ağır artilleriya atəşinə məruz qoyduğunu, nəticədə mülki əhali arasında ölənlərin olduğunu, Azərbaycan silahlı qüvvələrinin Azərbaycanın beynəlxalq səviyyədə tanınmış sərhədləri çərçivəsində cavab tədbirləri gördüyünü bildirib.

Səfir qeyd edib ki, Azərbaycanın işğal olunmuş ərazilərində Ermənistan silahlı qüvvələrinin qeyri-qanuni yerləşməsi hazırkı təhlükəli vəziyyətin əsas səbəbidir və regional sülh və sabitliyi təhlükə altına qoyur. Müxtəlif təxribatlar və vəziyyəti gərginləşdirməklə, habelə işğal olunmuş ərazilərdə hərbi mövcudluğu artırmaqla, ərazilərin demoqrafik və mədəni xüsusiyyətlərini dəyişmək cəhdləri ilə, eləcə də burada qeyri-qanuni iqtisadi fəaliyyətlə

Ermənistanın açıq-aşkar şəkildə Azərbaycan ərazilərini ilhaq etmək niyyəti güddüyünü vurğulayıb.

Diplomat status-kvonun yolverilməzliyi və kövrəkliyi faktını ATƏT-in Minsk qrupunun da təsdiq etdiyini bildirib. Ermənistanın BMT Təhlükəsizlik Şurasının qəbul etdiyi dörd qətnamədən irəli gələn tələbləri, həmçinin digər beynəlxalq təşkilatların qərar və qətnamələrini qulaqardına vurduğunu qeyd edib.

İsveçrə qəzetində Azərbaycanın səfirinin Dağlıq Qarabağla bağlı məqaləsi çap edildi