Qadınlarda ürək xəstəliyinin gizli əlamətləri: Həkimdən XƏBƏRDARLIQ
Qadınlarda ürək-damar xəstəlikləri hər zaman sinə ağrısı ilə özünü göstərmir.
Bəzən davamlı yorğunluq, nəfəs darlığı və başgicəllənmə də ürəkdə yaranan problemlərin əlaməti ola bilər.
Sfera.az xəbər verir ki, kardioloq Karla Okabe bu barədə “Terra” nəşrinə açıqlamasında bildirib.
Həkimin sözlərinə görə, qadınlarda ürək-damar xəstəliklərinin əlamətləri kişilərlə müqayisədə fərqli ola bilər. Uzun illər tibbi tədqiqatların əsasən kişilər üzərində aparılması ürək xəstəliklərinin daha çox klassik əlamətlərlə tanınmasına səbəb olub. Lakin müasir tibbi biliklər qadınlarda şikayətlərin fərqli şəkildə özünü göstərə biləcəyini ortaya qoyur.
Kardioloq qadınlarda ürək-damar problemlərinin mümkün əlamətləri sırasında davamlı yorğunluğu, fiziki fəaliyyət qabiliyyətinin azalmasını, əvvəllər çətinlik çəkmədən yerinə yetirilən işlər zamanı nəfəs darlığını, başgicəllənməni, ürək döyüntüsünün sürətlənməsini və bədənin müxtəlif nahiyələrində ağrıları qeyd edib.
Mütəxəssis vurğulayıb ki, bəzi qadınlar ürək-damar xəstəlikləri baxımından yüksək risk qrupunda olduqları halda, heç bir aşkar əlamət hiss etməyə bilərlər. Siqaret çəkmək, azhərəkətli həyat tərzi, artıq çəki, yüksək qan təzyiqi, qanda xolesterin və şəkərin səviyyəsinin yüksək olması bu riskləri artıra bilər.
Həmçinin ailəsində infarkt və ya insult keçirmiş şəxslər olan, autoimmun xəstəliklərdən və polikistik yumurtalıq sindromundan əziyyət çəkən qadınların ürək sağlamlığına xüsusi diqqət yetirməsi tövsiyə olunur.
Qeyd edək ki, sinə ağrısı ürək xəstəliklərinin mühüm əlamətlərindən biri olsa da, yeganə əlamət deyil. Xüsusilə yeni yaranan və səbəbi bilinməyən nəfəs darlığı, davamlı yorğunluq və fiziki gücə dözümlülüyün azalması diqqətdən kənarda qalmamalıdır. Bu əlamətlər müxtəlif səbəblərdən yarana bilsə də, təkrarlanarsa və ya davam edərsə, həkimə müraciət etmək vacibdir.
Fatimə
Sfera.az
