Yaxın görmədə inqilab: Gündə bir damcı ilə...

ABŞ Qida və Dərman Administrasiyası (FDA) yaşla əlaqəli yaxın görmə qüsuru - presbiopiyanın müalicəsi üçün nəzərdə tutulmuş yeni göz damcısını təsdiqləyib. “VIZZ” adlanan bu dərman gündə cəmi bir damcı ilə 10 saata qədər eynəksiz aydın görmə imkanı yaradır.

Sfera.az xarici mediaya istinadən xəbər verir ki, milyonlarla insana təsir edən presbiopiyanın müalicəsində yeni yol açan bu damcı “LENZ Therapeutics” şirkəti tərəfindən hazırlanıb.

“VIZZ” oxuyucu eynəklərə alternativ kimi təqdim olunur və tərkibindəki “aseklidin” adlı təsirli maddə vasitəsilə göz bəbəyini nazik şəkildə kiçildir. Bu proses kamera linzasının daraldılması ilə müqayisə edilə biləcək “iynə başı effekti” yaradır ki, nəticədə yaxınlıqdakı obyektlər daha aydın fokuslanır.

Ənənəvi müalicə üsullarından fərqli olaraq, “VIZZ” göz əzələlərini gərginləşdirmədən təsir göstərir və əvvəlki damcılarda rast gəlinən uzaq görmədə bulanıqlıq, baş ağrısı kimi yan təsirləri yaratmır.

Qeyd edək ki, gündə bir dəfə istifadə olunan bu dərman aseklidin əsaslı ilk və yeganə presbiopiya müalicəsi kimi qeydə alınıb. FDA-nın bu təsdiqi presbiopiya ilə mübarizədə yeni dövrün başlanğıcı hesab olunur.

Bəsti Rəfizadə
Sfera.az