Zoğal meyvəsi həm təbii dadı, həm də sağlamlığa göstərdiyi müsbət təsirlərlə daim diqqət çəkir. Marmelat, şərbət və çay formasında geniş istifadə olunan bu meyvə, xüsusilə ürək-damar xəstəliklərinin qarşısının alınması, iltihabın azaldılması və infeksiyalarla mübarizədə effektiv vasitə kimi tanınır.

Sfera.az bildirir ki, mütəxəssislər zoğalı “təbiətin ən güclü təbii dərmanlarından biri” kimi xarakterizə edirlər. Onların fikrincə, bu meyvənin tərkibində yüksək miqdarda antosiyaninlər, proantosiyanidinlər və kersetin kimi güclü antioksidantlar mövcuddur ki, bunlar insan orqanizmini müxtəlif xəstəliklərdən qorumaq baxımından mühüm rol oynayır.

Elmi Tədqiqatlar Nə Deyir?

Zoğalın sağlamlıq üçün faydaları 20-ci əsrdən bu yana müxtəlif elmi araşdırmaların mövzusuna çevrilib. Son illərdə aparılan klinik tədqiqatlar bu meyvənin və ondan hazırlanan məhsulların aşağıdakı müsbət təsirlərini ortaya qoyub:

Sidik yolları infeksiyalarına qarşı qoruyucu təsir göstərir

Ürək-damar sisteminin sağlamlığını dəstəkləyir

Qan təzyiqini tənzimləyir

LDL (“pis” xolesterin) səviyyəsini azaldır, HDL (“yaxşı” xolesterin) səviyyəsini artırır

Qandakı homosistein səviyyəsini tənzimləyərək damar tıxanıqlığının qarşısını alır

Tədqiqat nəticələri göstərir ki, zoğal, xüsusilə xroniki xəstəliklərə meyilli və ya risk altında olan insanlar üçün təbii dəstək vasitəsi kimi tövsiyə oluna bilər.

Zoğal təbii şəraitdə, heç bir kimyəvi müdaxilə olmadan yetişdirilir. Məhsul yığımı dövründə kəndlərdə canlanma müşahidə olunur. Yerli sakinlər meyvəni əsasən şəxsi istifadələri üçün toplayır, satışa çıxarılan hissə isə məhduddur.

Zoğalın marmelat, şərbət və ya çay formasında istifadəsi, onun həm sağlam, həm də dad baxımından cəlbedici olmasını təmin edir. Kimyəvi qatqılardan uzaq olan bu məhsul sağlam qidalanmaya üstünlük verənlər üçün əvəzsiz seçim sayılır.

Gülər

Təbiətin qırmızı möcüzəsi – Hər evə lazım olan meyvənin 5 böyük təsiri