Tozlu havalarda maska taxmaq vacibdirmi? – Həkim tövsiyəsi
Tozlu hava şəraiti insanların sağlamlığı üçün ciddi risklər yaradır. Mütəxəssislər toz hissəsickləri ilə insan sağlamlığına ziyan ola biləcək xəstəliklərin yayıldığını vurğulayırlar.
Sfera.az-a açıqlama verən terapevt, infeksionist Etibar Süleymanovun sözlərinə görə, insan orqanizmi təbii mühitə qarşı müəyyən müdafiə mexanizmlərinə malik olsa da, hazırkı şəraitdə əlavə tədbirlərin görülməsi vacibdir.
Həkim bildirir ki, göz qapaqları, kipriklər, eləcə də burun boşluğundakı xırda tüklər tozun nəfəs yollarına daxil olmasının qarşısını müəyyən qədər alır. Lakin atmosferdə zərərli maddələrin artması bu müdafiəni yetərsiz edir:
“Bakıda havada zərərli maddələrin miqdarı artıb. Bu maddələr toz vasitəsilə asanlıqla yayıla və tənəffüs yollarına düşərək müxtəlif xəstəliklərə səbəb ola bilər. Hətta bəzi insanlarda allergik reaksiyalar da müşahidə olunur. Buna görə də küləkli və tozlu havalarda maska və ya şərfdən istifadə tövsiyə olunur”.
E.Süleymanov həmçinin əlavə etdi ki, küləkli havalarda tüpürcək və hava-damcı yolu ilə yayılan infeksiyaların da yayılma riski artır:
“Məsələn, COVID-19 və ya vərəm kimi xəstəliklərin normalda 1–1,5 metr məsafədən keçməsi mümkün olduğu halda, toz vasitəsilə bu yoluxma məsafəsi 6 metrə qədər arta bilər. Bu da əlavə təhlükə yaradır”.
Həkim əhalini yalnız maskadan istifadə etməyə deyil, eyni zamanda immun sistemlərini gücləndirməyə də çağırır. Onun sözlərinə görə, sağlam qidalanma və düzgün həyat tərzi bu cür hava şəraitində daha da önəm kəsb edir.
Bəsti Rəfizadə
Sfera.az
