ABŞ-də aparılan yeni elmi araşdırma gündəlik meyvə və tərəvəz istehlakının təkcə sağlamlıq deyil, yuxu keyfiyyəti baxımından da böyük əhəmiyyət daşıdığını ortaya qoyub.

Sfera.az xəbər verir ki, Çikaqo və Kolumbiya universitetlərindən olan alimlər 28 yaş ortalamasına malik 34 sağlam gəncin iştirak etdiyi araşdırma çərçivəsində maraqlı nəticələr əldə ediblər. İştirakçılar gündəlik qidalanmalarını xüsusi mobil tətbiq vasitəsilə qeydə alıblar, yuxu keyfiyyətləri isə biləyə taxılan cihazlarla ölçülüb.

Araşdırma göstərib ki, gündə beş porsiya meyvə və tərəvəz qəbul edən şəxslərdə yuxu keyfiyyətində 16% yaxşılaşma müşahidə olunub. Eyni zamanda, tam taxıl kimi sağlam karbohidratları qəbul edənlərin daha rahat yuxuya getdiyi müəyyən edilib.

Alimlər bu müsbət təsiri bağırsaq mikrobiomundakı dəyişikliklərlə əlaqələndirirlər. Liflə zəngin bitki mənşəli qidalar yuxunu tənzimləyən serotonin və melatonin hormonlarının sintezini artıran faydalı bakteriyaların çoxalmasına səbəb olur.

Tədqiqatın rəhbərlərindən Dr. Tasali qeyd edib ki, qidalanmada edilən bu sadə dəyişikliklər yuxusuzluğa qarşı sürətli və əlçatan bir həll ola bilər.

Mütəxəssislər vurğulayırlar ki, bu nəticələr insanlara yaxşı yuxunun açarının məhz onların gündəlik seçimlərində olduğunu xatırladır. Qeyd edək ki, təkcə İngiltərədə beş milyondan çox insan həftədə üç və ya daha çox dəfə yuxu problemi yaşayır, lakin çox az hissəsi bu problemin həlli üçün mütəxəssisə müraciət edir.

Xroniki yuxu pozğunluqları isə ürək-damar xəstəlikləri, piylənmə, diabet və hətta bəzi xərçəng növləri kimi ciddi sağlamlıq problemlərinə yol aça bilər.

Yeni araşdırma bir daha sübut edir ki, yaxşı yuxu təkcə yorğunluqla deyil, boşqabımızdakılarla da sıx bağlıdır.

Bəsti Rəfizadə
Sfera.az

Meyvə və tərəvəz yuxu keyfiyyətini artırır – Yeni tədqiqat