Uşaqların sağlam böyüməsində düzgün qidalanma əsas rol oynayır. Lakin son illərdə aparılan araşdırmalar göstərir ki, bir çox valideyn bilmədən uşaqlarına sağlamlığa zərərli olan qidalar verir. Mütəxəssislər xəbərdarlıq edir ki, bəzi gündəlik istehlak olunan məhsullar uşaqlarda piylənmə, diqqət dağınıqlığı, hiperaktivlik və digər ciddi sağlamlıq problemlərinə səbəb ola bilər.

Bəs, hansı qidalar uşaqlar üçün təhlükəlidir?

Sfera.az həkimlərin məsləhətlərinə əsasən bildirir ki, uşaqlara ən çox zərər verən məhsullar sırasında şəkərli və qazlı içkilər, "fast-food", şirniyyatlar, emal olunmuş ət məhsulları (kolbasa, sosis və s.) və rəngli konfetlər ön sıradadır. Həkim-diyetoloqlar bildirir ki, bu məhsulların tərkibində yüksək miqdarda şəkər, trans yağlar, süni rəngləyicilər və konservantlar var ki, bunlar da uşaqların immun sisteminə mənfi təsir göstərir.

Bəs, bu qidaları hansı qidalarla əvəz etmək olar?

Mütəxəssislər valideynlərə tövsiyə edir ki, uşaqlara təbii meyvə şirələri, evdə hazırlanmış yeməklər, quru meyvələr və şəkərsiz desertlər təqdim etsinlər. Eyni zamanda, su içmək vərdişi erkən yaşlardan aşılanmalıdır.

Araşdırmalara görə, uşaq yaşda qəbul edilən zərərli qidalar gələcəkdə diabet, yüksək təzyiq və ürək-damar xəstəliklərinin yaranmasına zəmin yaradır. Qidalanma vərdişləri uşağın gələcək həyat keyfiyyətini müəyyən edir.

Mütəxəssislər xəbərdarlıq edir ki, valideynlər uşaqları sevdikləri qədər onların qida təhlükəsizliyinə də diqqət göstərməlidirlər. Zərərli qidaların yerini sağlam alternativlərlə əvəz etmək həm asandır, həm də həyati əhəmiyyət daşıyır.

Bəsti Rəfizadə
Sfera.az

Uşaqları bu qidalardan uzaq tutun: İmmun sisteminə mənfi təsir göstərir