Yay mövsümünün vazkeçilməz ləzzətlərindən olan dondurma, isti havalarda həm sərinlik, həm də şirin zövq mənbəyi kimi sevilir. Lakin mütəxəssislər xəbərdarlıq edirlər ki, bu ləzzətli məhsul hər kəs üçün uyğun deyil və bəzi insanlar üçün sağlamlıq baxımından təhlükəli ola bilər.

Sfera.az xəbər verir ki, qidalanma üzrə mütəxəssislərin bildirdiyinə görə, dondurmanın nəzarətsiz və düşünülmədən qəbulu bəzi hallarda ciddi fəsadlara səbəb ola bilər. Mütəxəssislər bəzi risk qruplarına aid şəxsləri xüsusi ilə diqqətli olmağa çağırırlar.

İlk sırada immuniteti zəif olan şəxslər dayanır. Belə ki, bu şəxslərdə soyuq qidaların qəbulu zamanı boğaz və yuxarı tənəffüs yollarında iltihab riski artır. Angina, tonzillit və faringit kimi xəstəliklərə meyilli olan insanlar üçün dondurma əlavə təhlükə yarada bilər.

Allergiyadan əziyyət çəkənlər isə dondurma yedikləri zaman, tərkibindəki süd, yumurta, qoz, fıstıq və əlavə qatqı maddələri allergik reaksiyalara səbəb ola bilər. Bəzi hallarda bu reaksiyalar həyati təhlükə də yarada bilər.

Dondurmanın yüksək şəkər tərkibi onu diabet xəstələri üçün də riskli edir. Qan şəkərinin kəskin artması fəsadlara yol aça bilər. Belə şəxslərə yalnız həkim məsləhəti ilə az şəkərli və ya xüsusi hazırlanmış dondurmalardan istifadə etmələri tövsiyə olunur.

Piylənmədən əziyyət çəkənlər üçün də bu qida təhlükə yaradır.

Dondurma yüksək kalorili məhsuldur və davamlı istifadəsi çəkidə artıma səbəb olur. Bu, həmçinin maddələr mübadiləsinin pozulması ilə nəticələnə bilər.
Süd məhsullarına qarşı dözümsüzlüyü olan insanlar dondurma qəbul etdikdə qarın ağrısı, köp və ishal kimi problemlərlə üzləşmə ehtimalı var. Bu səbəbdən onlar yalnız laktozasız alternativlərə üstünlük verməlidirlər.

2 yaşa qədər uşaqların dondurma qəbul etməməsi də zərərlidir.

Uşaqların immun və həzm sistemləri tam inkişaf etmədiyi üçün, bu yaşda dondurma qəbulu allergik reaksiyalar və həzm pozuntuları ilə nəticələnə bilər.
Qastrit, mədə yarası və digər həzm problemləri olanlar üçün dondurmanın tərkibindəki soyuqluq və yağlılıq əlavə narahatlıq və ağrılara səbəb olma ehtimalı var.
Mütəxəssislər qeyd edirlər ki, dondurma tamamilə qadağan ediləcək bir qida deyil, lakin onun istifadəsində diqqətli olmaq vacibdir. Ən təhlükəsiz seçim təbii inqrediyentlərlə evdə hazırlanmış və az şəkərli dondurmalardır. Dondurmanı acqarına və ya çox soyuq vəziyyətdə yeməkdən də çəkinmək tövsiyə olunur.
Nəticə olaraq, hər kəsin sevdiyi bu yay ləzzəti zərərli olmaması üçün fərdi sağlamlıq vəziyyəti nəzərə alınaraq və ölçülü şəkildə istehlak edilməlidir. Mütəxəssislər bildirir ki, dondurma zövq gətirsə də, sağlamlıq hər şeydən önəmlidir.

Bəsti Rəfizadə
Sfera.az

Kimlərə dondurma olmaz? – Mütəxəssislərdən vacib xəbərdarlıq