Bir inci saflığı varsa da... - Su içməyin ZƏRƏRLƏRİ

Yay aylarında həm havaların isinməsi, həm də arıqlamaq istəyənlərin sayı artdıqca, suya olan maraq da artır. Bir tərəfdə günvurma və susuzluq qorxusu, digər tərəfdə isə “su pəhrizi” ilə tez nəticə əldə etmək istəyənlər....

Ancaq həkimlər xəbərdarlıq edir, həddindən artıq su içmək bəzən bədəni sağlamlaşdırmaq əvəzinə zəhərləyə bilər.

Sfera.az bildirir ki, mütəxəssislər bu vəziyyəti “su zəhərlənməsi” və ya tibbi adı ilə “hiponatremiya” adlandırırlar. 

Bu zaman orqanizmdəki natrium – yəni duz balansı pozulur, bədəndəki maye səviyyəsi qeyri-təbii şəkildə artır və hüceyrələr su ilə dolaraq şişməyə başlayır. Xüsusilə beynin şişməsi huşun itməsi, baş ağrısı, ürəkbulanma, qarışıqlıq və hətta komaya qədər aparan ağır nəticələrə səbəb ola bilər.

Son illərdə internetdə yayılan “3 günlük su pəhrizi” və ya “7 gündə su ilə 5 kq arıqlayın” tipli çağırışlar bir çox insanı yanlış istiqamətə yönəldir. Arıqlamaq və detoks məqsədilə gün ərzində yalnız su içərək yeməkdən imtina etmək, ilk baxışdan sadə və sağlam görünə bilər. Amma bu cür pəhrizlər zamanı orqanizmin enerji, vitamin və elektrolit balansı tamamilə pozulur. Həkimlər bildirir ki, suyun öz-özlüyündə təmizləyici təsiri olsa da, qida qəbul etmədən uzun müddət yaşamaq bədən üçün ciddi təhlükədir.

Belə ki, yayda su içmək vacib olsa da, bu, ifrata varmamalıdır. Normal şəraitdə gün ərzində 2–2,5 litr su bədən üçün yetərlidir. Ancaq bu suyun miqdarı bir anda deyil, gün ərzində bərabər şəkildə paylanmalıdır. İnsanlar elə düşünür ki, nə qədər çox su içsələr, orqanizm o qədər təmizlənəcək. Əslində isə suyun həddindən artıq qəbulu bədəndəki duzların səviyyəsini kəskin azaldır və bu, baş gicəllənməsi, zəiflik və ürək ritmində pozulmalara yol aça bilər.

Bir çox hallarda su zəhərlənməsi ilk baxışdan adi susuzluq və yorğunluqla səhv salınır. Ancaq bu vəziyyət gec fərq edildikdə nəticələr ölümcül ola bilər. Tibb tarixində marafon qaçışlarında və ya isti havalarda çoxlu su içərək bədənini sərinlətmək istəyən insanlar arasında ölüm hallarına da rast gəlinib.

Həkimlərin tövsiyəsi sadədir: su həyat mənbəyidir, amma yalnız ehtiyac qədər içildikdə. Bədənimiz öz ehtiyacını bildirmək üçün siqnallar verir – susadıqda içmək, doyduqda dayanmaq bu siqnallardan biridir. Yay aylarında bol maye qəbul etmək önəmlidir, amma bu mayenin tərkibi və miqdarı balanslı olmalıdır. Ən yaxşısı  su içməyi vərdişə çevirmək, amma ekstremal üsullardan uzaq durmaqdır.

Unutmayın, sağlam olmaq üçün su içmək vacibdir, lakin hər şeyin artığı zərərlidir – hətta suyun da.

Firuzə Əliyeva
Sfera.az