MRT və KT-də dövlət günlərlə gözlədir - Səbəb nədir? - Rəsmi AÇIQLAMA

Azərbaycanda icbari tibbi sığorta sistemi ölkə üzrə uğurla tətbiq olunsa da, bəzən vətəndaşlar bir sıra xidmətlər üçün, xüsusilə MRT (Maqnit Rezonans Tomoqrafiya) və KT (Kompüter Tomoqrafiya) kimi diaqnostik müayinələrə görə uzun gözləmə müddəti ilə üzləşirlər. Vətəndaşların sözlərinə görə, bu cür müayinələr üçün dövlət xəstəxanalarında bəzən aylarla növbə gözləmək lazım gəlir. 

Bu vəziyyət adıçəkilən müayinələrdən istifadə etmək istəyən insanlarda narazılığa səbəb olmaqla yanaşı, sığorta sisteminin təcili ehtiyacları qarşılamadığı qənaətini də yaradır.

Mövzu ilə bağlı Sfera.az İcbari Tibbi Sığorta üzrə Dövlət Agentliyinə sorğu göndərib.

İcbari Tibbi Sığorta üzrə Dövlət Agentliyi məsələyə belə aydınlıq gətirib:

“Vətəndaşlara instrumental diaqnostik müayinələr (MRT, KT) göndəriş verildiyi tarixdən 14 gündən gec olmayaraq gözləmə müddəti ərzində həyata keçirilir. Vətəndaşa həmin müddət ərzində dövlət xəstəxanalarında tibbi xidmətin göstərilməsi mümkün olmadıqda İcbari Tibbi Sığorta üzrə Dövlət Agentliyinin müqaviləli tibb müəssisələrinə, yəni özəl və müvafiq dövlət orqanlarının tabeliyindəki xəstəxanalara göndəriş verilir”.

Agentlikdən bildirildi ki, bununla yanaşı, tibbi xidmətlərin keyfiyyətini və əlçatanlığını artırmaq üçün yeni maliyyə mexanizmi də tətbiq olunub:

“Xidmətin keyfiyyətini və əlçatanlığını artırmaq məqsədilə cari ilin aprel ayının sonunda Nazirlər Kabinetinin müvafiq qərarı ilə ixtisaslı həkim göstərişi əsasında ambulator şəraitdə göstərilən MRT və KT müayinələrinə müştərək maliyyələşmə məbləği tətbiq edilib. Yəni, həkim göstərişi ilə MRT və ya KT müayinəsinə yönləndirilən vətəndaş tibbi xidmət üzrə Xidmətlər Zərfindəki tarifin 20%-i həcmində müştərək maliyyələşmə məbləği ödəyir, qalan məbləğ isə İcbari Tibbi Sığorta üzrə Dövlət Agentliyi tərəfindən qarşılanır”.

Agentlik bildirir ki, bu yanaşma tibbi xidmətlərin davamlı və effektiv şəkildə təşkilinə yönəlib. Lakin real təcrübə göstərir ki, nəzəri qaydalar praktikada istənilən nəticəni vermir.

Problemlə üzləşən vətəndaşlara tövsiyə edilir ki, ilk növbədə tibb müəssisəsinin məsul şəxslərinə və ya rəhbərliyinə müraciət etsinlər. 

Agentlik açıqlamasında qeyd edib ki, vətəndaş ona verilmiş cavabdan və yaxud görülmüş tədbirdən razı qalmazsa TƏBİB-in 815 Çağrı mərkəzinə zəng edə, [email protected] elektron poçt ünvanına müraciət edə bilər. Eyni zamanda, Agentliyə də müraciət edilə bilər. Bunun üçün vətəndaşlar Agentliyin 1542 Çağrı Mərkəzinə zəng edə və ya ttps://its.gov.az/page/elektron-muraciət linkinə daxil olaraq elektron şəkildə müraciət edə bilərlər.

Ekspertlər isə hesab edir ki, sistemin effektivliyi üçün cihaz sayının artırılması və tibb müəssisələrinin resurslarının gücləndirilməsi vacibdir. Əks halda, icbari tibbi sığortanın əsas məqsədi olan hamı üçün bərabər tibbi xidmət yalnız kağız üzərində qalacaq.

Bəsti Rəfizadə
Sfera.az