Dünyanı sarsıdan COVİD-19 pandemiyasının yaranacağını illər əvvəl proqnozlaşdıra bilən tanınmış elmi yazıçı David Quammen növbəti pandemiya ilə bağlı ciddi xəbərdarlıq edib. Quammenin fikrincə, hal-hazırda bəzi ölkələrdə, xüsusilə İngiltərədə yayılmış və insanlarla təmasda olan H5N1 quş qripi virusu yeni pandemiyanın əsas səbəbi ola bilər.

Sfera.az "NTV"yə istinadən xəbər verir ki, İngiltərənin Mirror qəzetinə danışan Quammen bildirib ki, quş qripi hazırda insanlar üçün ən böyük təhlükələrdən biridir və virusun insanlar arasında asanlıqla yayıla biləcək formada mutasiyaya uğraması halında fəlakətli nəticələrə yol aça bilər:

“Əgər bu gün bir elm adamı kimi növbəti böyük pandemiyanın nə olacağını təxmin etməli olsaydım, mən deyərdim ki, quş qripi (H5N1) bu ehtimala ən yaxın namizəddir”.

Bu açıqlama, İngiltərənin Yorkshire bölgəsində bir qoyunda H5N1 virusunun aşkarlanmasından qısa müddət sonra gəlib. Virus hal-hazırda ABŞ-də də yayılmağa davam edir. Rəsmi məlumatlara görə, H5N1 virusu 1000-dən çox südverən inəyə və 168 milyondan artıq ev quşuna təsir göstərib. Ölkədə 70 nəfərin virusa yoluxduğu, bir nəfərin isə həyatını itirdiyi bildirilir.

Virusun müxtəlif heyvanlarda pişik, ayı, hətta delfin kimi növlərdə də aşkar edildiyi qeyd olunub. İndiyədək insandan insana yoluxma halları qeydə alınmasa da, mütəxəssislər virusun mutasiya keçirməsi halında insanlar arasında yayılma ehtimalının real olduğunu bildirirlər.

Amerika Xəstəliklərə Nəzarət və Profilaktika Mərkəzləri (CDC) quş qripinin insanlara hazırda aşağı risk yaratdığını açıqlasa da, Quammen kimi ekspertlər gələcəkdə riskin artmasından narahatdırlar.

COVİD-19 pandemiyasının başlanğıcını dəqiq təxmin edən Quammenin bu dəfəki xəbərdarlığı bir çox ölkələrdə sağlamlıq qurumlarının diqqətini cəlb edib.

Bəsti Rəfizadə
Sfera.az

“Növbəti pandemiya artıq aramızdadır” - Quammendən xəbərdarlıq