Subayların bu xəstəliyə tutulma riski azdır - Elmi araşdırma
ABŞ-də aparılan bir araşdırma göstərib ki, evlilik və demensiya (ağılsızlıq) riski arasında əlaqə var.
Sfera.az xəbər verir ki, “Alzheimer’s and Dementia” jurnalında yayımlanan tədqiqata əsasən, alimlər 18 il ərzində 24 mindən çox demensiya faktını araşdırıb.
Araşdırma nəticələrinə görə, evli olmayan fərdlərdə (boşanmış və ya heç evlənməmiş) evli olanlara nisbətən demensiyanın inkişaf riskinin 50% aşağı olduğu ortaya çıxıb. Xüsusilə, heç evlənməmiş insanlar ən aşağı risk qrupunda yer alır. Boşanmış insanlar belə evli qalanlara nisbətən daha az demensiya riski daşıyır.
Tədqiqat zamanı 50-104 yaş arasındakı 24 107 iştirakçı hər il nevropsixoloji testlərdən keçirilib. Subayların evlilərə nisbətən unutqanlıq və Altsheymer (demensiyanın müalicəsi mümkün olmayan forması - red.) kimi xəstəliklərə daha az meylli olduqları üzə çıxıb.
Araşdırmanın nəticələrinə görə, subaylar sosial əlaqələrini daha yaxşı qorumağa meyillidir və bu da onların daha az demensiya riski ilə əlaqələndirilib.
Alimlər subayların dostları və qonşuları ilə daha çox sosial əlaqə qurma ehtimalının yüksək olduğunu bildirib.
Demensiyanın erkən əlamətləri arasında yaddaş itkisi, planlama və problem həllində çətinliklər, zaman və məkanla bağlı qarışıqlıq, vizual əlaqələrdə çətinliklər və əşyaların yanlış yerdə qoyulması kimi hallar var. Bu əlamətlərdən birini hiss edən şəxslərin dərhal həkimə müraciət etməsi tövsiyə edilir.
Bəsti Rəfizadə
