Bu piylər ürək sağlamlığı üçün təhlükəlidir - Gizli yerlərdə yığılırlar

Son araşdırmalar göstərir ki, əzələlər arasında yığılan piylər ürək xəstəlikləri və 2-ci tip şəkərli diabet riskini artırır.

Sfera.az “NTV”yə istinadən xəbər verir ki, Boston şəhərindəki Qadın Xəstəxanasının ilə Harvard Tibb Fakültəsinin alimləri tərəfindən aparılan araşdırma, əzələlərdə yığılan piyin birbaşa ürək sağlamlığına təsir etdiyini ortaya çıxarıb.

669 nəfər üzərində aparılan tədqiqatın nəticələrinə əsasən, əzələlərdə piy faizi artdıqca kiçik qan damarlarının zədələnmə riski də yüksəlir.

Mütəxəssislər bildirirlər ki, bu təhlükəli piy yığıntıları insanın çəkisi ilə müəyyən edilə bilmir. Bədən Kütlə İndeksi (BMI) aşağı olan insanlarda belə əzələlər arasında artıq piy toplana bilər. Araşdırmaya rəhbərlik edən Professor Viviani Taquetinin sözlərinə görə, eyni BMI göstəricisinə sahib şəxslərdə əzələlərdəki piy faizi 5%-dən 25%-ə qədər dəyişə bilər.

Tədqiqatçılar müəyyən ediblər ki, əzələlərdəki piy miqdarı hər 1% artdıqda, ürək xəstəliyi riski 7% yüksəlir. Bu piy yığıntıları qanda qlükozanın artmasına səbəb olaraq damarların daralmasına və ürəyin qanı effektiv şəkildə vurmasını çətinləşdirə bilər.

Professor qeyd edib ki, dərinin altındakı piyin ürək xəstəlikləri ilə əlaqəsi daha azdır: "Lakin daxili orqanlar ətrafında və əzələlərdə toplanan piylər bədənə hormonlar və kimyəvi siqnallar göndərərək metabolizmanı poza bilər”.

Araşdırmalara görə, yaş artdıqca əzələlərdəki piy miqdarı da yüksəlir. Bu isə hərəkət məhdudiyyətinə və əzələ zəifləməsinə səbəb ola bilər.

Mütəxəssislər bildirirlər ki, müntəzəm fiziki aktivlik əzələlərdəki piy səviyyəsini azaltmağa kömək edə bilər. Floridadakı "Advent Health Translational Research Instituteun"un elmi direktoru  Bret Qudpasterin sözlərinə görə, arıqlama və idman proqramlarında iştirak edən insanlar əzələlərindəki artıq piydən xilas olurlar.

Hazırda əzələlərdəki piyin miqdarını müəyyən etmək üçün yüksək texnologiyalı tibbi müayinələr tələb olunur. Ancaq alimlər hesab edirlər ki, sağlam qidalanma, müntəzəm idman və balanslı çəki saxlamaq əzələlərdə zərərli piyin yığılmasının qarşısını ala bilər.

Bəsti Rəfizadə