Depressiya, xroniki yorğunluq, dəri xəstəlikləri: Bu orqandakı problemlərin xəbərçisidir

Bağırsaq sağlamlığı insanın psixoloji vəziyyətinə və ümumi sağlamlığına birbaşa təsiri var. Mütəxəsislərin araşdırmasına əsasən, stres, əsəb, narahatlıq və hətta xoşbəxtlik kimi emosional hallar bağırsaqların fəaliyyətinə təsir edə bilər.

Sfera.az Türkiyə mediasına istinadən xəbər verir ki, bağırsaqlar insan orqanizminin ikinci beyni hesab olunur və düzgün işləmədikdə müxtəlif sağlamlıq problemləri ortaya çıxır. 

Mütəxəssislər xəbərdarlıq edirlər ki, bağırsaq problemləri yalnız həzm sistemi ilə məhdudlaşmır, eyni zamanda depressiya, xroniki yorğunluq və dəri xəstəlikləri kimi hallara da səbəb olur.

Bağırsaq pozuntularının beş əsas göstəricisi var:

    •    Həzm problemləri – Daimi qaz yığılması, qəbizlik və ya ishal, turşu qayıtması (reflü), qarın ağrısı və ağız qoxusu.
    •    Xroniki yorğunluq – Davamlı enerji azlığı və halsızlıq hissi.
    •    İmmunitetin zəifləməsi – Tez-tez xəstələnmək və infeksiyalara meyillilik.
    •    Dəri problemləri – Sızanaq, ekzema və digər dəri xəstəlikləri.
    •    Ruh halının dəyişməsi – Depressiya, narahatlıq, beyin dumanı (“brain fog”) və əsəbilik.

Əgər bu əlamətlər uzun müddət davam edərsə, mütləq həkimə müraciət etmək tövsiyə olunur.

Mütəxəssislər bağırsaq sağlamlığını yaxşılaşdırmaq üçün lifli qidalara üstünlük verməyi, probiyotiklər qəbul etməyi, su istehlakını artırmağı və emal olunmuş qidalardan uzaq durmağı tövsiyə edirlər.

Bəsti Rəfizadə