“Günəşli hava insanların psixologiyasına təsir edir” - Psixoloq

Azərbaycanda sərt şaxtalı və qarlı havadan sonra nisbətən mülayim və günəşli hava şəraiti müşahidə edilir. Psixoloqların fikrincə, soyuq keçən günlərdən sonra hava şəraitinin mülayimləşməsi insanların psixoloji vəziyyətinə müsbət təsir göstərir. 

Sfera.az-a aşıqlama verən psixoloq Nizami Orucov bildirib ki, tutqun və yağışlı-qarlı hava şəraiti, xüsusən də qış aylarında, mövsümi depressiya və enerji azlığına səbəb olur.

Psixoloqun sözlərinə görə, günəşli havalarda isə insanların əhvalında köklü dəyişiklik baş verir: “Günəşin bizə ötürdüyü enerji var. İşıqlı, isti, aydın hava şəraiti insanları daha məhsuldar, pozitiv və canlı ruh halında olmağa vadar edir. Bu hal həm də günün uzanması və havanın gec qararması ilə əlaqədardır ki, bu da yuxu hormonumuzun gec fəaliyyətə başlamasına səbəb olur. Qışda isə, günün qısalması, çox vaxt buludlu və soyuq, günəşsiz hava şəraiti, insanlarda yorğunluq, enerji azlığı və tənbəllik yaradır”. 

Psixoloq hesab edir ki, hava şəraitinin insanların əhvalına təsiri hamıda eyni şəkildə ola bilməz. Lakin o, fəslin dəyişməsi ilə bağlı psixoloji hal dəyişiklikləri yaşayan insanların çox olduğunu söylədi. 

Bəsti Rəfizadə